असोज ८ गतेदेखिको बाढी र पहिरोमा २१ जनाको मृत्यु, पाँच बेपत्ता

काठमाडौँ : पछिल्लो समय देशभर परेको अविरल वर्षा, बाढी र पहिरोका कारण २१ जनाको मृत्यु भएको छ भने पाँच जना बेपत्ता भएका छन् ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार असोज ८ गतेदेखि ११ गते साँझसम्मको विवरणमा विपद्का विभिन्न घटनामा पाँच जना घाइते भएका छन् ।

प्राधिकरणका अनुसार यस अवधिमा ४२६ वटा विपद्का घटना भएका छन् । ती घटनाबाट ७४७ परिवार प्रभावित भएका छन् । बाढी, पहिरो र अविरल वर्षाका कारण १४३ घर पूर्ण रूपमा र ५१ घर आंशिक रूपमा क्षतिग्रस्त भएका छन् ।

सबैभन्दा बढी क्षति पहिरोबाट भएको छ । पहिरोका २५६ घटनामा १४ जनाको मृत्यु, पाँच जना बेपत्ता र चार जना घाइते भएका छन् । पहिरोबाट १४७ परिवार प्रभावित भएका छन् भने १९ घर पूर्ण र १२ घर आंशिक रूपमा क्षतिग्रस्त भएका छन् ।

बाढीका ५३ घटनामा चार जनाको मृत्यु भएको छ। बाढीबाट ३५० परिवार प्रभावित भएका छन् भने १०१ घर पूर्ण र दुई घर आंशिक रूपमा क्षतिग्रस्त भएका छन् ।

त्यस्तै, अविरल वर्षाका कारण भएका ११७ घटनामा तीन जनाको मृत्यु र एक जना घाइते भएका छन्। वर्षाका कारण २५० परिवार प्रभावित भएका छन् भने २३ घर पूर्ण र ३७ घर आंशिक रूपमा क्षतिग्रस्त भएका छन्।

प्राधिकरणका अनुसार असोज ५ गते नेपाल मौसम विज्ञान विभागले विशेष मौसमी बुलेटिन जारी गरेपछि उच्च सतर्कताका लागि अनुरोध गरिएको थियो । असोज ६ गते सरोकारवाला निकायसँग सम्पर्क गरी पूर्वतयारीमा लाग्न निर्देशन दिइएको थियो ।