मलेखु–मुग्लिङ सडकखण्ड सुचारु, केही स्थानमा एकतर्फी आवागमन

धादिङ  : पृथ्वी राजमार्गअन्तर्गत मलेखु–मुग्लिङ सडकखण्डको हुग्दी खोला नजिक पानीधारामा खसेको पहिरो पन्छाएपछि सडक सुचारु भएको छ ।

हिजो बेलुकी करिब ६ बजे ठूला चट्टानसहित पहिरो खसेपछि अवरुद्ध भएको सडक आज बिहान पहिरो पन्छाउने काम सम्पन्न भएसँगै सञ्चालनमा आएको हो ।

यद्यपि धारापानी, फिस्लिङ र जवाङ खोलामा सडकको छेउ भासिएका कारण ती स्थानमा सडक एकतर्फी रूपमा सञ्चालनमा रहेको नागढुङ्गा–मुग्लिङ सडक आयोजनाले जानकारी दिएको छ । यसअघि लगातारको वर्षाका कारण मलेखु–मुग्लिङ सडकखण्डका विभिन्न स्थानमा पहिरो र सडक भासिने समस्या देखिएको थियो ।

त्यस्तै आयोजनाले वर्षा रोकिए पनि पहिरो झर्ने जोखिम कायमै रहेकाले कृष्णभीर, धारापानी, फिस्लिङ, घोप्टेभीर, सिमलधारा तथा हुग्दी खोला–जवाङ खोला क्षेत्रमा यात्रा गर्दा सडकको अवस्था बुझेर मात्र यात्रा गर्न आग्रह गरेको छ ।

आयोजनाले सवारी चालकलाई तोकिएको गतिसीमा कायम राख्न, लेन अनुशासन पालना गर्न, जथाभावी ओभरटेक नगर्न तथा ट्राफिक नियमको पूर्ण पालना गर्दै संयमित र सावधानीपूर्वक यात्रा गर्न अनुरोध गरेको छ ।