पहिरो र नदी कटानका कारण यी सडक पूर्ण रूपमा अवरुद्ध

काठमाण्डौ, १८ श्रावण । देशभर लगातार भइरहेको वर्षाका कारण पहिरो, लेदो र नदी कटानले विभिन्न जिल्लाका प्रमुख सडकखण्ड पूर्ण रूपमा अवरुद्ध भएका छन् ।

नेपाल प्रहरीले सार्वजनिक गरेको पछिल्लो विवरणअनुसार दोलखा, रसुवा, गोरखा, तेह्रथुम, म्याग्दी र ललितपुरका महत्वपूर्ण सडकखण्डमा सवारी आवागमन ठप्प भएको छ। केही स्थानमा वैकल्पिक मार्ग सञ्चालनमा ल्याइए पनि अधिकांश सडक खुलाउने प्रयास जारी रहेको छ ।

रसुवाको उत्तरगया गाउँपालिका–५ खाल्टेमा साउन ८ गते बिहान ८ बजे त्रिशूली नदीले कच्ची सडकमुनिबाट कटान गरेपछि त्रिशूली–मैलुङ–स्याफ्रुबेँसी हुँदै जाने पासाङ ल्हामु सडकखण्ड पूर्ण रूपमा बन्द भएको छ ।

त्यस्तै, गोरखाको धार्चे गाउँपालिका–३ अण्डरडाँडामा साउन १६ गते ढुंगा, माटोसहितको लेदो पहिरो खसेपछि लार्के–बेनीघाट कच्ची सडक पूर्ण रूपमा अवरुद्ध भएको छ । त्यस्तै, तेह्रथुमको लालीगुराँस नगरपालिका–९ काडेमा साउन १७ गते राति पहिरो खस्दा मध्यपहाडी लोकमार्ग पूर्ण रूपमा बन्द भएको छ, जसका कारण पूर्व–पश्चिम आवागमनमा असर परेको छ ।

यसैगरी, म्याग्दीको रघुगंगा गाउँपालिका–२ बैसेरीमा साउन १८ गते सडकमाथिबाट लेदोसहितको पहिरो खस्दा बेनी–जोमसोम सडकखण्ड अवरुद्ध भएको छ । सोही दिन बिहान ललितपुरको बागमती गाउँपालिका–३ पाङदुरमा अविरल वर्षाका कारण पहिरो खसेपछि कान्तिलोक पथ पनि पूर्ण रूपमा बन्द भएको प्रहरीले जनाएको छ ।

प्रहरीले अवरुद्ध सडक खुलाउने काम सम्बन्धित निकायसँगको समन्वयमा भइरहेको जनाएको छ । वर्षा अझै जारी रहेकाले पहिरो प्रभावित सडकमा अत्यावश्यक बाहेक यात्रा नगर्न तथा यात्रा गर्नै परे सम्बन्धित निकायबाट सडकको अवस्थाबारे जानकारी लिएर मात्र यात्रा गर्न सर्वसाधारणलाई आग्रह गरिएको छ।

Single Image