रासायनिक मल ल्याइदै, रोपाइँ प्रभावित

काठमाडौँ: नेपालमा ३० हजार मेट्रिक टन रासायनिक मल नेपाल भित्रिन सुरु भएको छ । कृषि, वन तथा पर्यावरण मन्त्रालयका अनुसार ग्लोबल टेन्डरमार्फतबाट नेपालका लागि ३० हजार मेट्रिक टन रासायनिक मल भारतको कोलकाता बन्दरगाहमा आइपुगेको हो । 

सो मलमध्ये १ हजार २५० मेट्रिक टन मल आज नेपालतर्फ ढुवानी सुरु भएको छ । यो आज ढुवानी सुरु भएको मल करिब चार दिनभित्र नेपाल आइपुग्ने अनुमान गरिएको छ ।

बाँकी रहेको मल हाल कोलकाता बन्दरगाहमै प्याकेजिङ (ब्यागिङ) को काम भइरहेको छ । प्याकेजिङ सम्पन्न भएसँगै क्रमशः बाँकी खेप पनि छिटो नै नेपाल भित्रिने मन्त्रालयले जनाएको छ ।

धानको रोपाइँ हुने समयमा रासायनिक मल उपलब्ध नभएपछि देश भर किसान असन्तुष्ट रहेका छन् भने रोपाइँ समेत प्रभावित बनेको छ । सरकारले गोदाममा मल रहेको तर स्थानीय तहले समन्वय नगरेको आरोप लगाएको छ र किसानले सधै झैँ रोपाइँको समयमा मल नपाएको गुनासो गरेका छन् । मन्त्रालयको आँकडा अनुसार असार ३२ गतेसम्म देशभर ६२ प्रतिशत रोपाइँ भएको छ, जबकी गत बर्ष यस अवधिसम्म ७२ प्रतिशतभन्दा बढी रोपाइँ भएको थियो ।