विश्वकपमा भोली बिहान नर्वे र सेनेगल भिड्दै

काठमाडौँ: जारी फिफा विश्वकप अन्तर्गत भोली बिहान समुह आइ अन्तर्गत नर्वे र सेनेगल आमने सामने हुदै छन् । न्यूजर्सी स्टेडियममा हुने यो खेल नेपाली समय अनुसार भोली बिहान ५: ४५ बजेदेखि शुरु हुदैछ । 

बोस्टनमा भएको आफ्नो पहिलो खेलमा नर्वेको प्रदर्शन प्रभावशाली रह्यो । इर्लिङ हालान्डले विश्वकपमा पहिलो गोल गर्दै दुई गोल गरे भने लियो ओस्टिगार्डले पनि गोल थपे । अन्त्यतिर अयमेन हुसेनको आत्मघाती गोलले नर्वेको इराकलाई ४–१ ले पराजित गरेको थियो । 

नर्वेको यो जितसँगै उनीहरूको उत्कृष्ट लय पनि कायम छ। प्रशिक्षक स्टाले सोलबक्केनको टोलीले पछिल्ला ११ प्रतिस्पर्धात्मक खेल लगातार जितेको छ, जसमा ५० गोल गरेको र केवल ७ गोल मात्र खाएको छ। उनीहरूको पछिल्लो हार सन् २०२४ अक्टोबरमा युइएफए नेसन्स लिग अन्तर्गत अस्ट्रियासँग ५–१ को हार हो ।

यस खेलमा नर्वेले इतिहास पनि बनाउन सक्छ । उनीहरूले एकै विश्वकप संस्करणमा अहिलेसम्म एकभन्दा बढी खेल जित्न सकेका छैनन् । यो वर्ष उनीहरूको चौथो विश्वकप उपस्थिति हो । 

सेनेगल भने प्रतियोगिताको सुरुआतमै कठिन स्थितिमा पुगेको छ । पहिलो खेलमा उनीहरू फ्रान्ससँग ३-१ ले पराजित भए । किलियन एम्बाप्पे र उनको टोलीको दबाबबीच इब्राहिम म्बायेले अतिरिक्त समयको अन्त्यमा सान्त्वना गोल गरे, जसले सेनेगललाई केही आत्मविश्वास दिएको छ । १८ वर्ष १४३ दिनको उमेरमा म्बाये विश्वकप इतिहासमा गोल गर्ने सबैभन्दा कान्छा अफ्रिकी खेलाडी बनेका छन् ।

अब समूह चरणको कठिन खेल सकिएकाले प्रशिक्षक पापे थियावले टोलीलाई पुनः फर्काउन र प्रतियोगितामा बाँकी सम्भावना जोगाउन नर्वेविरुद्ध राम्रो प्रदर्शनको अपेक्षा गरेका छन् । सेनेगलले पछिल्ला १२ विश्वकप खेलमा लगातार गोल खाँदै आएको छ, जसले उनीहरूको कमजोर रक्षापंक्तिलाई देखाउँछ ।

नर्वेका स्टार हालान्डले पछिल्ला ११ खेलमा लगातार गोल गरेका छन् र पछिल्ला ५ खेलमा एकभन्दा बढी गोल गरेका छन्। सन् २०२३ यता उनले २० अन्तर्राष्ट्रिय खेलमध्ये १७ खेलमा गोल गरेका छन्। मिडफिल्डर मार्टिन ओडेगार्डको भूमिका पनि निर्णायक मानिएको छ। इराकविरुद्ध नर्वेका ८ पासले विपक्षी रक्षापंक्ति तोडेका थिए, जसमा ४ पास ओडेगार्डकै थिए। उनले ४२ मध्ये ४१ पास सफल बनाएका थिए।

दुई टोलीबीचको ऐतिहासिक तथ्य अनुसार नर्वे र सेनेगल विश्वकपमा पहिलो पटक आमनेसामने हुँदैछन्। अन्तिम पटक यी दुई टोली सन् २००६ मा मैत्रीपूर्ण खेलमा भेट भएका थिए, जहाँ सेनेगलले २-१ ले जितेको थियो।

विश्वकपमा अफ्रिकी टोलीविरुद्ध नर्वेले अहिलेसम्म केवल एक खेल खेलेको छ, जसमा सन् १९९८ मा मोरक्कोसँग २-२ को बराबरी खेलेको थियो।

सेनेगलले सुरुआती समयमा युरोपेली टोलीविरुद्ध राम्रो नतिजा निकाले पनि पछिल्ला तीन खेल लगातार हार्दै आएको छ, जसमा फ्रान्ससँगको हार पनि समावेश छ ।