विश्वकपमा भोली बिहान फ्रान्स र इराक आमने सामने

काठमाडौँ: फ्रान्सले जारी फिफा विश्वकपको समुह आइ अन्तर्गतको खेलमा आज राति  इराकसँग खेल्दैछ ।  फिलाडेल्फिया स्टेडियममा हुने यो खेल नेपाली समय अनुसार भोली भोली बिहान २: ४५ बजेदेखि शुरु हुदैछ ।

यो खेल किलियन एम्बाप्पेका लागि ऐतिहासिक अवसर बन्न सक्ने देखिएको छ । एम्बाप्पे यदि यस खेलमा मैदान प्रवेश गरे भने फ्रान्सका लागि आफ्नो सयौँ अन्तर्राष्ट्रिय खेल पूरा गर्नेछन् । यसअघि नै उनले सेनेगलविरुद्धको खेलमा दुई गोल गर्दै फ्रान्सका सर्वकालीन सर्वाधिक गोलकर्ता बनेका थिए । अब उनी विश्वकप इतिहासकै सर्वाधिक गोलकर्ताको कीर्तिमान नजिक पुगेका छन् ।

तर यो दौडमा लियोनल मेसी पनि अगाडि छन् । मेसीले अल्जेरियाविरुद्ध ह्याट्रिक गरेपछि मिरोस्लाभ क्लोजे बराबरी गर्दै विश्वकप सर्वाधिक गोलकर्ताको सूचीमा शीर्ष स्थानमा पुगेका छन् । मेसीको खेल फ्रान्स–इराक खेलभन्दा अघि नै हुने भएकाले कीर्तिमान फेरि बदलिन सक्ने सम्भावना छ ।

यदि मेसीले अस्ट्रियाविरुद्ध गोल गर्न सकेनन् भने एमबापेलाई इराकविरुद्ध ह्याट्रिक गर्दै एकल रूपमा शीर्ष स्थानमा पुग्ने मौका मिल्न सक्छ ।

फ्रान्सले सेनेगलविरुद्ध सुरुवातमा केही संघर्ष गरेको थियो । पहिलो हाफमा उनीहरू पछि पर्न सक्ने अवस्था पनि बनेको थियो । तर प्रशिक्षक डिडिए डेसचाम्पले दोस्रो हाफमा रणनीति परिवर्तन गरेपछि टोलीले राम्रो प्रदर्शन गर्‍यो । सबैभन्दा उल्लेखनीय परिवर्तन उस्मान डेम्बेले र माइकल ओलिसेको भूमिका अदलबदल थियो । डेम्बेलेलाई आक्रमणको केन्द्रमा राखिएको थियो भने ओलिसे दायाँतर्फ थिए ।

पछि स्थान परिवर्तन भएपछि फ्रान्सको आक्रमण अझ प्रभावकारी बन्यो । ओलिसेले एमबापेलाई दिएको पासमा फ्रान्सले अग्रता लिएको थियो । ओलिसेले फ्रान्सका लागि छोटो समयमा नै उल्लेखनीय योगदान दिइरहेका छन् । यदि इराकविरुद्ध पनि उनले गोल वा पासमा योगदान दिए भने लगातार तीन खेलमा योगदान गर्ने उनको पहिलो अवसर हुनेछ ।

फ्रान्सले यो खेल जितेमा लगातार चौथो विश्वकप संस्करणमा पहिलो दुई खेल जित्ने उपलब्धि दोहोर्‍याउनेछ ।

डेसचाम्पले आक्रमण पंक्तिमा फेरबदल गर्न सक्ने सम्भावना पनि छ । सेनेगलविरुद्ध उनले ढिलो मात्र परिवर्तन गरेका थिए । त्यस खेलमा ब्राडली बारकोलाले मैदान प्रवेश गरेपछि केही मिनेटमै गोल गरेका थिए ।

त्यस्तै रयान शेर्की पनि अन्तिम समयमा मैदानमा आएका थिए । उनले राम्रो अवसर पाए पनि पूर्ण प्रभाव देखाउन सकेका थिएनन् । तर क्लब स्तरमा उत्कृष्ट प्रदर्शन गर्दै आएका उनी यस खेलमा सुरुवाती रोजाइमा पर्न सक्ने सम्भावना छ ।

इराकका लागि भने यो खेल निकै कठिन हुने अनुमान छ । नर्वेविरुद्धको पहिलो खेलमा उनीहरूले सुरुवातमा राम्रो संघर्ष गरे पनि पछि ४-१ को हार बेहोरेका थिए । फरक स्तरको टोलीसँग खेल्दा उनीहरू कमजोर देखिएका थिए ।

इराकले विश्वकप इतिहासमा अहिलेसम्म सबै खेल हारेका छन् र लगातार पाँच खेल हार्ने पहिलो एसियाली राष्ट्र बन्ने जोखिममा छन् । आयमेन हुसेन इराकका मुख्य आशा हुन् । छनोट चरणमा उनले धेरै गोल गरेका थिए र नर्वेविरुद्ध पनि टोलीका लागि एक मात्र गोल गरेका थिए । फ्रान्स र इराक पहिलो पटक आमनेसामने हुन लागेका हुन् । युरोपेली टोलीविरुद्ध पछिल्ला खेलमा इराकले केही सुधार देखाए पनि फ्रान्सजस्तो बलियो टोलीविरुद्ध चुनौती निकै कठिन रहनेछ ।