दीपक भट्ट र सुलभ अग्रवाल पुर्पक्षका लागि थुनामा

काठमाण्डौ, ०४ अषाढ़ । विशेष अदालतले सम्पत्ति शुद्धीकरणको मुद्दामा दीपक भट्ट र व्यवसायी सुलभ अग्रवाललाई पुर्पक्षका लागि थुनामा पठाउने आदेश दिएको छ ।

बुधवार बयान र थुनछेक बहसपछि बिशेष अदालतका बिशेष अदालतका न्यायाधीशहरू सुदर्शनदेव भट्ट, नारायण प्रसाद कोइराला र विदुर कोइरालाको इजलासले भट्ट र अग्रवाललाई कारागार चलानको आदेश दिएको हो । सम्पत्ति शुद्धीकरण अनुसन्धान विभागको अनुसन्धान प्रतिवेदनका आधारमा बिशेष सरकारी वकिल कार्यालयले भट्टविरुद्ध २६ तथा अग्रवालविरुद्ध २५ अर्ब रुपैयाँको बिगोसहित गत बिहीबार उनीहरूविरुद्ध मुद्दा दायर गरेको थियो ।

बिमा, धितोपत्र तथा बैंकिङ कसुरमार्फत आर्जन गरेको सम्पत्ति उनीहरूले शुद्धीकरण गरेको अभियोग छ। जिल्ला अदालतमा बिमा र धितोसम्बन्धि तथा उच्च अदालतमा बैंकिङ कसुर मुद्दा दायर भइसकेको छ। सत्ताको आडमा उनीहरूले अबौंको वित्तिय अपचलन गरेको सरकार विभिन्न निकायको अनुसन्धानबाट खुलेको छ । उनीहरूको अन्य कारोबारमाथि सम्पत्ति शुद्धीकरणले थप अनुसन्धान गरिरहेको छ।