सुकुमवासी बस्ती हटाउने सरकारको कदमविरुद्ध माइतीघरमा प्रदर्शन

काठमाडौँ: काठमाडौँ उपत्यकामा नदी किनारका सुकुमवासी बस्ती हटाउने सरकारी अभियानविरुद्ध विरोध प्रदर्शन भएको छ। शनिबार माइतीघरमा जेनजी सेन्टर का अभियन्ताहरूले सुकुमवासी बस्तीमा डोजर चलाइएको घटनाको विरोध गर्दै प्रदर्शन गरेका हुन्।

प्रदर्शनकारीहरूले ‘सार्वजनिक जग्गा सरकारको, सुकुमवासी जनता कसको ?’, ‘खोइ मानवता डोजरले पुर्‍यो’ लगायतका नारा लेखिएका प्लेकार्ड बोकेका थिए।

यसैबीच बालाजु, स्वयम्भूलगायत क्षेत्रमा नदी किनारका संरचनामा डोजर चलाइएको छ। काठमाडौँ महानगरपालिका–१९ स्थित बुद्धज्योती बाल उद्यम आधारभूत विद्यालय क्षेत्रमा समेत संरचना हटाइएको छ।

सरकारले दोस्रो चरणमा अतिक्रमित संरचना हटाइरहेको छ भने यसअघि बल्खु, शंखमूल, वंशीघाटलगायत क्षेत्रमा पनि घरटहरा भत्काइएको थियो।