फैसला कार्यान्वयनका लागि १४ फरार प्रतिवादी पक्राउ

रौतहट : रौतहट प्रहरीले १४ जना फरार प्रतिवादीलाई पक्राउ गरेको छ । अदालतको फैसला कार्यान्वयनलाई प्रभावकारी बनाउने उद्देश्यले फरार प्रतिवादीलाई पक्राउ गरेको हो ।

जिल्ला प्रहरी कार्यालय रौतहटले सार्वजनिक गरेको विवरणअनुसार पक्राउ पर्नेमा  लागुऔषध, जुवा, कुटपिट, जालसाजी, वन ऐन उल्लघंन तथा सम्बन्ध विच्छेदसम्बन्धी मुद्दामा सजाय तोकिएका प्रतिवादीहरू छन्।

कुटपिट तथा लुटपिट मुद्दामा कमल साह तेली र शुभ नारायण साह पक्राउ परेका छन् भने, जालसाजी अभियोगमा बद्री पासवानलाई नियन्त्रणमा लिइएको जिल्ला प्रहरी कार्यालय रौतहटका प्रहरी प्रवक्ता एवम् डिएसपी दीपककुमार रायले बताए ।

उनका अनुसार सम्बन्ध विच्छेदसम्बन्धि मुद्दामा मो असलमलाई पक्राउ गरिएको छ। लागूऔषध मुद्दामा प्रेम राना, सागर अर्याल, विन राना मगर (किरण राना मगर) र सन्तमान लामा (सन्चरमान तामाङ), जुवा खेल्ने अभियोगमा किशोर कुमार चौधरी, राम दिनेश साह र शिवराज अधिकारी क्षेत्री पक्राउ गरिएको उनले जानकारी दिए । पक्राउ परेका १४ जनालाई फैसला कार्वान्यनको लागी जिल्ला अदालत रौतहटमा उपस्थित गराइएको प्रवक्ता रायले बताए ।

जिल्ला प्रहरी कार्यालय रौतहटले फरार रहेका प्रतिवादीलाई पक्राउ अभियान नै संचालन गरेको छ ।अदालतको आदेशअनुसार फरार रहेका अन्य प्रतिवादीहरूको समेत खोजी कार्य जारी राखेको जिल्ला प्रहरी कार्यालय रौतहटले जनाएको छ ।