मध्यपूर्वमा युद्धको सन्त्रास: लाखौँ विदेशी नागरिक अलपत्र, उद्धारका लागि विश्वभरका राष्ट्रहरूबीच दौडधुप

संयुक्त राज्य अमेरिका र इजरायलले इरानमाथि गरेको आक्रमण र त्यसपछि इरानले खाडी मुलुक तथा इजरायलमा सुरु गरेको जवाफी हमलाका कारण मध्यपूर्व यतिबेला रणमैदानमा परिणत भएको छ। यस तनावका बीच त्यहाँ रहेका लाखौँ विदेशी नागरिकहरू ज्यान जोगाउन र आफ्नो देश फर्कन संघर्ष गरिरहेका छन्।

मध्यपूर्वमा करिब ५ देखि १० लाख अमेरिकी नागरिक रहेको अनुमान छ, तर उनीहरूले दूतावासमा अनिवार्य दर्ता नगर्ने भएकाले यकिन संख्या उपलब्ध छैन। यद्यपि, अमेरिकी दूतावासले अहिले नै प्रत्यक्ष उद्धार गर्न नसकिने बताएको छ।

इरानको राजधानी तेहरानमा भइरहेको भीषण बमबारीबाट जोगिन विदेशी नागरिकहरू सडकमार्ग हुँदै अजरबैजानतर्फ भागिरहेका छन्। इरान र अजरबैजानबीचको अस्तारा सीमा नाका विदेशीहरूका लागि खोलिएको छ। शनिबारदेखि यता करिब ४०० जनाले यो सीमा पार गरिसकेका छन्, जसमा नेपाल, भारत, फ्रान्स, इटाली, पोल्याण्ड, चीन र पाकिस्तान लगायत १९ देशका नागरिकहरू रहेका छन्।

युरोपेली युनियनले आफ्ना सदस्य राष्ट्रहरू इटाली, अस्ट्रिया र स्लोभाकियालाई नागरिक उद्धारका लागि आर्थिक र प्राविधिक सहयोग सुरु गरेको छ।

बेलायत: प्रधानमन्त्री कीर स्टारमरले आफ्ना नागरिकलाई तुरुन्त दर्ता गर्न आग्रह गरेका छन्। त्यहाँ करिब ३ लाख बेलायती रहेको अनुमान छ।

फ्रान्स: फ्रान्सले आफ्ना ४ लाख नागरिकमध्ये जोखिममा रहेकाहरूलाई सैन्य र व्यावसायिक उडानबाट फिर्ता ल्याउन सुरु गरेको छ।

अष्ट्रेलिया: १ लाख १५ हजार अष्ट्रेलियाली नागरिक अलपत्र परेका छन्, तर आकाश मार्ग बन्द भएकाले उद्धारमा कठिनाइ भइरहेको विदेश मन्त्री पेनी वोङले बताएकी छिन्।

इटाली: इटालीले ओमान हुँदै आफ्ना नागरिक फिर्ता ल्याउन चार्टर उडान सुरु गरिसकेको छ।

रुसले आफ्ना हजारौँ नागरिकलाई मध्यपूर्वबाट निकाल्न आपत्कालीन विमानहरू परिचालन गरेको छ। मस्कोले अबु धाबी र ओमानबाट १,००० भन्दा बढी रुसीहरूलाई फिर्ता लगिसकेको छ भने थप ४,५०० जनालाई शनिबारसम्ममा उद्धार गर्ने लक्ष्य राखेको छ। इरानबाट अजरबैजान भागेका रुसीहरूका लागि विशेष 'Il-76' यातायात विमान पठाइएको छ।

उडान तथ्याङ्क विश्लेषण गर्ने संस्था 'सिरियम'का अनुसार, शनिबारदेखि मंगलवार सम्म झन्डै १८ हजार भन्दा धेरै उडानहरू रद्द भएका छन्। यो योजनाबद्ध उडानहरूको करिब ४० प्रतिशत हो। कतिपय विमानस्थलहरू बिस्तारै खुल्न थाले पनि व्यावसायिक उडानहरू अझै सामान्य हुन सकेका छैनन्।

यस युद्धले मध्यपूर्वमा रहेका विदेशी कामदार र पर्यटकहरूमा ठूलो त्रास पैदा गरेको छ। एकातिर अमेरिका र इजरायलको सैन्य अभियान र अर्कोतिर इरानको प्रतिवादका कारण यो क्षेत्र अझै केही समय अस्थिर रहने देखिएको छ।