बंगलादेशले भारतमा सुरक्षा कारण देखाउँदै भिसा र कन्सुलर सेवा बन्द

काठमाण्डौ, ८ पुष । भारतस्थित बंगलादेश उच्चायोगले सुरक्षा कारण देखाउँदै सबै भिसा र कन्सुलर सेवाहरू अस्थायी रूपमा निलम्बन गरेको छ ।

मिडिया रिपोर्टहरूका अनुसार, यो निलम्बन अर्को सूचना नभएसम्म लागू रहनेछ । यसअघि, अगरतलास्थित बंगलादेश वाणिज्य दूतावासले पनि भिसा सेवाहरू निलम्बन गरेको थियो ।

आइतबार, भारतले सुरक्षा अवस्थाका कारण चटगाउँस्थित आफ्नो सहायक उच्चायोगमा भिसा सेवाहरू निलम्बन गरेको थियो । भारत विरोधी विरोध प्रदर्शनपछि यो निर्णय लिइएको थियो । बिहीबार, चटगाउँमा एक भीडले भारतीय सहायक उच्चायुक्तको निवासमा पुगेर ढुङ्गा प्रहार गरेको थियो । खुलना, राजशाही र ढाकामा रहेका भारतीय कार्यालयहरू बाहिर पनि भारत विरोधी नाराहरू लगाइएको थियो । शनिबार राति, बंगलादेशमा एक हिन्दू युवाको हत्याको विरोधमा दिल्लीस्थित बंगलादेश उच्चायोग बाहिर विरोध प्रदर्शन भएको थियो ।

विदेश मन्त्रालयका प्रवक्ता रणधीर जयसवालले विरोध प्रदर्शन धेरै सानो र शान्तिपूर्ण रहेको बताएका थिए । बंगलादेशले भारतको भनाइलाई अस्वीकार गर्दै स्थिति धेरै गम्भीर भएको बताएको छ । ढाकाले घटनालाई भ्रामक प्रचार भन्नु गलत भएको बताएको छ । बंगलादेशको गृह मन्त्रालयले पनि उस्मान हादीको हत्याका अभियुक्तले भारतमा शरण लिएको कुनै ठोस जानकारी नभएको बताएको छ । 

हादीको हत्यापछि बंगलादेशमा भारतविरुद्ध आक्रोश व्यक्त गरिएको छ ।  साथै, बंगलादेशमा अहिले अल्पसंख्यक हिन्दू, बौद्ध, क्रिश्चियन माथी त्यहाँका कट्टरपन्थी इस्लामिक अतिवादीहरुको भिडले व्यापक आक्रमण (मोब लिञ्चिङ) गर्ने गरेको छ । केहि दिन अघि एक हिन्दू युवा दिपुचन्द्र दासलाई यसरी नै कुटपिट गरेर पछी आगो लगाएर मारिएको थियो ।