चीनको गुइलिनमा नेपाल–चीनबीच सांस्कृतिक तथा पर्यटन प्रवद्र्धन गरिने

काठमाडौं :  चीनको गुइलिनमा आगामी वैशाख २८ गते तेस्रो एएमएस नेपाल–चीन सांस्कृतिक फ्यूजन तथा पर्यटन प्रवद्र्धन कार्यक्रम हुने भएको छ । 

आइतवार पत्रकार सम्मेलन गर्दै एएमएस म्युजिक एण्ड इन्टरटेइनमेन्ट प्रालिले चीनस्थित गुइलिन मर्चेन्टस इन्टरनेशल ट्राभल सर्भिस, गुइलिन पर्यटन विश्वविद्यालय र गुइलिन इग्लिस कर्नर स्कुलसँगको सहकार्यमा उक्त कार्यक्रम आयोजना गर्न लागेको जानकारी दिएको हो । 
नेपाली कलाकार, पर्यटन व्यवसायी, उद्यमी तथा व्यापारी, सरकारी प्रतिनिधिलगायतको ४० भन्दाबढीको सहभागितामा कार्यक्रम आयोजना गर्न लागिएको आयोजक टिमले जानकारी दिएको छ ।

 
कम्पनीका अध्यक्ष सत्यकला लामा तामाङले विभिन्न देशमा नेपालको संस्कृतिलाई चिनाउने उद्देश्यले यो कार्यक्रम गर्न लागेको बताइन् । 

‘एएमएसबाट विभिन्न देशमा नेपालको संस्कृतिलाई चिनाउनु पर्छ भन्ने उद्देश्यले विदेशी संस्कृति नभित्र्याई हाम्रो सांस्कृतिलाई विदेशीले चिनोस् । नेपालको संस्कृति हेर्न भएपनि एकचोटि जानुपर्छ है भन्ने हिसावले पर्यटन बढाउनुको साथै नेपालको संस्कृतिलाइ चिनाउन यो कार्यक्रम गर्दै आएका छौ,’ उनले भनिन् । 

उनले चीनको गुइलिनमा दुवै देशको सांस्कृतिक आदानप्रदान तथा पर्यटन प्रवद्र्धन गर्ने उद्देश्यले कार्यक्रम आयोजना गर्न लागिएको बताइन् । 

कार्यक्रममा नेपाल र चीनका मौलिक गीत, नृत्य प्रस्तुत गर्नुका साथै नेपालको पर्यटन प्रवद्र्धन गरिनेछ । कम्पनीका प्रबन्ध निर्देशक फुर्बा ग्याल्बो मोक्तान (थुप्तेन)ले आफूहरुले यसअघि पनि स्वदेश तथा विदेशमा जापान, यूएई जस्ता देशहरुमा यसप्रकारका कार्यक्रम गरिसकेको जानकारी दिँदै यसले नेपाल र चीनबीचको सम्बन्ध अझ आत्मीय र बलियो हुने बताए ।

कार्यक्रममा नेपालको संस्कृति र पर्यटन क्षेत्रमा योगदान पुर्याउने व्यक्तित्वहरुलाई अवार्ड समेत प्रदान गरिने जानकारी दिए ।

 
उनले भने, ‘कार्यक्रममा नेपाल र चीन दुवै देशका कलाकारहरु, पर्यटन व्यवसायी, व्यवसायी र सरकारका प्रतिनिधिहरु सहभागी हुनेछन्, त्यसले दुवै देशबीचको सम्बन्ध अझ बलियो बनाउन सहयोग पुर्याउनेछ ।’

कोरियोग्राफर कमल राईले चीनको गुइलिनमा राई, लिम्बु, गुरुङ, थारुलगायत पूर्वमेचीदेखि पश्चिम महाकालीसम्मका भेषभुषा र संस्कृतिको प्रतिनिधित्व हुने गरी नृत्य प्ररस्तुत गरिने बताए । 

एएमएस म्युजिक एण्ड इन्टरटेइनमेन्टले यसअघि नेपालमा एभरेष्ट टुरिजम अवार्ड–२०२५, विसं २०७९ सालमा टुरिजम अवार्ड कार्यक्रम आयोजना गरिसकेको छ । साथै जापान र यूएईमा पनि सांस्कृतिक आदानप्रदान कार्यक्रम सम्पन्न गरिसकेको छ ।

नेपाली कलाकार, पर्यटन व्यवसायी, उद्यमी तथा व्यापारी, सरकारी प्रतिनिधिलगायतको ४० भन्दाबढीको सहभागितामा कार्यक्रम आयोजना गर्न लागिएको जानकारी दिइन ।