महामन्त्रीमा हारेपछि डा. सुनिल शर्माले भने- पार्टी रूपान्तरणको अभियान जारी रहनेछ

काठमाडौँ : नेपाली कांग्रेसको १५औँ महाधिवेशनमा खुलातर्फ महामन्त्री पदमा पराजित भएपछि डा. सुनिल शर्माले पार्टी रूपान्तरण र जनसेवाको अभियान निरन्तर जारी राख्ने बताएका छन् ।

शर्माले आफ्नो उम्मेदवारी कुनै पद प्राप्त गर्ने आकांक्षामा मात्र सीमित नभई कांग्रेसलाई जनमुखी, सेवामुखी, आधुनिक र परिणाममुखी बनाउने सङ्कल्प भएको बताएका छन् । उनले बीपी कोइरालाको विचार, लोकतान्त्रिक मूल्य मान्यता र जनसेवाको आदर्शलाई आत्मसात् गर्दै पार्टी र जनताबीचको सम्बन्ध सुदृढ बनाउने प्रतिबद्धता पनि दोहोर्‍याएका छन् ।

उनले आफूलाई विश्वास गरेर अमूल्य मत दिने देशविदेशबाट आएका सम्पूर्ण महाधिवेशन प्रतिनिधिप्रति आभार व्यक्त गरेका छन् ।

आफ्नो चुनावी अभियानमा सक्रिय रूपमा खटिएका अग्रज, साथी, सहयात्री र शुभेच्छुकलाई पनि उनले धन्यवाद दिएका छन् ।

निर्वाचनको परिणामले आफ्नो राजनीतिक जिम्मेवारी र पार्टी रूपान्तरणप्रतिको सङ्कल्प कमजोर नबनाएको उल्लेख गर्दै शर्माले यसबाट अझ परिपक्वता, दृढता र जिम्मेवारीबोधका साथ अघि बढ्ने प्रेरणा मिलेको बताएका छन् ।

पदमा रहे पनि नरहे पनि दुर्गम क्षेत्रका नागरिकको सेवामा समर्पित रहने बताउँदै उनले कांग्रेसभित्र सकारात्मक परिवर्तन, सङ्गठन सुदृढीकरण र जनउत्तरदायी राजनीतिक संस्कार स्थापना गर्ने प्रयास निरन्तर जारी राख्ने प्रतिबद्धता व्यक्त गरेका छन् ।

शर्माले चुनावी प्रतिस्पर्धामा सहभागी सबै नेता, निर्वाचित पदाधिकारी तथा पार्टीका कार्यकर्ताप्रति सम्मान व्यक्त गर्दै आगामी दिनमा पनि उनीहरूसँगै रहेर पार्टी र जनताको हितमा काम गर्ने बताएका छन् । उनले जनताको सेवा र देशको समुन्नतिका लागि निरन्तर अघि बढ्ने प्रतिबद्धतासमेत जनाएका छन् ।