हामी जीवनी लेख्न होइन इतिहास बनाउन आएका हौँ- रवि लामिछाने

काठमाडौँ: राष्ट्रिय स्वतन्त्र पार्टी (रास्वपा) सभापति रवि लामिछानेले आफु इतिहास बनाउन राजनीतिमा आएको बताएका छन् ।

रास्वपाका सांसदहरुलाई दिएको दुई दिनको प्रशिक्षणको समापन कार्यक्रममा बोल्दै सभापति लामिछानेले आफु जीवनी लेख्न राजनीतिमा नआएको बताउदै इतिहास लेख्न आएको र यसको शुरुवात भइसकेको बताएका हुन् ।

लामिछानेले आफुहरुले सजिलो क्रान्ति गरेर अहिले सत्तामा आएको बताउदै पुराना दलहरुले ३० बर्षसम्म आफ्नो सबै कुरा बिर्सेर देशका लागि संघर्ष गरेर प्रजातन्त्र ल्याएको र  जनयुद्ध जस्ता क्रान्ति गरेर अहिले अवस्था आएको बताए ।

उनले भने- 'अहिले कति सजिलो छ, घरमा बिहान घरमा खाना खाएर परिवारसँग बसेर बालबच्चासँग बसेर काम गर्ने अवसर छ । यति सजिलो अवस्थामा पनि हामीले काम गर्न सकेनौं भने हामि जस्तो नालायक कोहि हुने छैन ।'

उनले सांसद भएर आफ्नो भूमिका निभाउनुपर्ने बताउदै मन्त्री भएर मात्र प्रतिष्ठा बढ्ने नभएको र सांसदको रुपमा कानुन बनाउने काममा लाग्नुपर्ने जोड दिए ।