उज्यालो नेपाल र श्रम संस्कृति पार्टीबीच एकताबारे निरन्तर छलफल: कुलमान घिसिङ

काठमाडौँ: कुलमान घिसिङ नेतृत्वको उज्यालो नेपाल पार्टी र हर्क साम्पाङ नेतृत्वको श्रम संस्कृति पार्टीबीच एकतासम्बन्धी छलफल जारी रहेको अध्यक्ष घिसिङले बताएका छन्।

आज काठमाडौंमा सञ्चारकर्मीहरूसँग कुरा गर्दै उनले नयाँ राजनीतिक दलहरूबीच एकताको चर्चा हुनु स्वाभाविक भएको बताए। उनले आगामी स्थानीय तहको निर्वाचनमा पार्टीले सशक्त भूमिका निर्वाह गर्ने दाबीसमेत गरे।

घिसिङले भने, “स्थानीय तहमा धेरै ठाउँमा हामी जित्छौँ। जित्ने गरी अगाडि बढ्ने तयारी भइरहेको छ। एकता पनि हुन सक्छ, कार्यगत एकता पनि हुन सक्छ, वा एक्लै पनि जान सकिन्छ—परिस्थिति हेरेर निर्णय हुन्छ।”

उनका अनुसार श्रम संस्कृति पार्टीसँग समय–समयमा संवाद भइरहेको छ र वार्ता रोकिएको छैन। “उहाँहरूले प्रस्ताव ल्याउनुभएको छ। त्यसबारे छलफल भइरहेको छ,” उनले थपे।