कसलाई मतदान गर्नुहुन्छ भनेर सोध्नु आचार संहिताको उलंघन

कतै तपाईपनि कसलाई भोट हाल्नुहुन्छ भनेर सोधिरहनु भएको छ, यदि छ भने ख्याल गर्नुहोस है। यसो गर्नु निर्वाचन आचार संहिताको उलंघन गर्नु हो।  

जिल्ला निर्वाचन कार्यालय काठमाडौँले सामाजिक सञ्जाल र केही अनलाइन सञ्चारमाध्यमले 'कसलाई मत दिनुहुन्छ?' भनी सोधेर मतदाताको गोपनीयता भङ्ग गरेकोमा कडा आपत्ति जनाएको छ। निर्वाचन आचारसंहिता, २०८२ को दफा ४ बमोजिम यस्ता कार्य नगर्न र नगराउन कार्यालयले सचेत गराएको हो।

नियमअनुसार, उम्मेदवारको अन्तिम नामावली प्रकाशन भएपछि मतदान हुने दिनभन्दा १७ दिन अघिदेखि मात्रै निर्वाचन प्रचारप्रसार, जुलुस, आमसभा वा घरदैलो गर्न पाइने व्यवस्था छ। तर, कतिपय राजनीतिक दल र उम्मेदवारले निर्धारित समयअगावै कोणसभा गर्ने र प्रचार सामग्री प्रसारण गरी मतदातालाई प्रभाव पार्न खोजेको पाइएको निर्वाचन कार्यालयले जनाएको छ।

अनुगमन अधिकृतहरूले संयुक्त रूपमा ध्यानाकर्षण गराउँदै, आचारसंहिता उल्लङ्घन गरेको प्रमाण भेटिएमा प्रचलित कानुनबमोजिम तत्काल कारबाही प्रक्रिया अघि बढाइने चेतावनी दिएका छन्। निर्वाचनको स्वच्छता कायम राख्न आचारसंहिताको पूर्ण पालना गर्न सम्पूर्ण सरोकारवालालाई आग्रह गरिएको छ।