आईजीपी हटाउने निर्णयमा आङ्देम्बेको प्रश्न– ‘यो सुशासन होइन, शक्ति प्रदर्शन हो’

काठमाडौं : प्रमुख प्रतिपक्षी दल नेपाली कांग्रेसका संसदीय दलका नेता भीष्मराज आङ्देम्बेले नेपाल प्रहरीका महानिरीक्षक (आईजीपी) लाई कार्यकाल सकिन १७ महिना बाँकी रहँदै पदबाट हटाउने सरकारको निर्णयप्रति कडा आपत्ति जनाएका छन् ।

आङ्देम्बेले अनेक तानाबाना र षड्यन्त्रको जालो बुनेर प्रहरी प्रमुख हटाउनु सुशासन नभई शक्ति प्रदर्शन भएको टिप्पणी गरेका हुन् ।

उनले वर्तमान सरकारको प्राथमिकता नागरिकका समस्या समाधान गर्नुभन्दा आईजीपी परिवर्तन गर्नेतर्फ केन्द्रित भएको आरोप लगाएका छन् ।

 भोटेकोशी र बूढीगण्डकीमा आएको बाढीबाट नागरिक पीडित भएको, सुकुम्वासी विस्थापनको समस्या रहेको र महँगीले जनजीवन प्रभावित भइरहेका बेला प्रहरी प्रमुख परिवर्तन गर्नु नै राष्ट्रिय आवश्यकता हो भन्दै उनले प्रश्न गरेका छन् ।

त्यस्तै, प्रहरी महानिरीक्षकलाई कुन तथ्य र प्रमाणका आधारमा हटाइएको हो भन्ने विषयमा सरकारले जवाफ दिनुपर्ने उनको माग छ ।

सरकारका प्रवक्ता र राष्ट्रिय स्वतन्त्र पार्टी (रास्वपा) का प्रवक्ताको अभिव्यक्तिबीच देखिएको विरोधाभासप्रति पनि उनले प्रश्न उठाएका छन् । सरकार पार्टीको निर्देशनमा चलेको हो वा होइन भन्ने विषयमा स्पष्ट पार्नुपर्ने उनको भनाइ छ ।

अनुसन्धानका क्रममा प्रहरीले बरामद गरेको बिचौलियाको मोबाइल प्रधानमन्त्रीका प्रमुख राजनीतिक सल्लाहकारको घरमा पुगेको भनिएको घटनालाई पनि आङ्देम्बेले गम्भीर रूपमा उठाएका छन् । अनुसन्धानका लागि बरामद गरिएको मोबाइल त्यहाँ किन पुग्यो र त्यसमा भएको के मेटाउन खोजिएको थियो भन्दै उनले प्रश्न गरेका छन् ।

जनताले वर्तमान सरकारलाई सुशासन कायम गर्न, भ्रष्टाचार अन्त्य गर्न र जनताको जीवनस्तर सुधार गर्न मत दिएको उल्लेख गर्दै उनले सत्ता र शक्तिको दुरुपयोग गर्न तथा प्रहरी प्रशासनलाई नियन्त्रणमा राख्न जनमत प्राप्त नभएको बताएका छन् ।

‘अनेक तानाबाना र षड्यन्त्रको जालो बुनेर आईजीपी हटाउनु गलत छ। यो सुशासन होइन, शक्ति प्रदर्शन हो,’ आङ्देम्बेले भनेका छन् ।