वर्षा र पहिरोका कारण देशका यी सडकखण्ड प्रभावित

काठमाण्डौ, १० असोज । लगातारको वर्षा, पहिरो तथा खोलामा बढेको बहावका कारण देशका विभिन्न राष्ट्रिय राजमार्ग तथा सडकखण्डमा यातायात प्रभावित भएको छ । सडक विभागले सार्वजनिक गरेको पछिल्लो विवरणअनुसार केही सडकमा यातायात पूर्ण रूपमा रोकिएको छ भने केही सडकखण्डमा एकतर्फी तथा सावधानीपूर्वक यातायात सञ्चालन भइरहेको छ ।

पृथ्वी राजमार्गअन्तर्गत कृष्णभीर, चाक्लाभीर, ज्वाङ खोला र किर्तिपुललगायत क्षेत्रमा यातायात बन्द रहेको छ । स्थानीय प्रशासनबाट अर्को सूचना जारी नभएसम्म यातायात सञ्चालनमा रोक लगाइएको छ । विभिन्न स्थानमा पहिरो पन्छाउने काम सुरु गरिएको र राजमार्ग पुनः सञ्चालनमा ल्याउने प्रयास भइरहेको सडक विभागले जनाएको छ ।

बिपी राजमार्गअन्तर्गत माम्ती, पिप्ले, दाउन्ने–कालोपुल, चारसयबेँसी, कडुने र चौकीडाँडालगायत क्षेत्रमा सडक अवरुद्ध भएको छ । सडकमा पहिरो तथा ढुंगा खसेका कारण अवरुद्ध सडक पुनः सञ्चालनमा ल्याउने प्रयास भइरहेको छ ।

कान्ति राजमार्गको चपली र तकुर्चे लगायतका क्षेत्रमा आंशिक रूपमा सडक प्रभावित भएको छ । मकवानपुर खण्डमा पहिरो पन्छाई यातायात सञ्चालनमा ल्याउने काम जारी छ भने ललितपुर खण्डमा पनि पहिरो पन्छाउने काम भइरहेको छ। बिहान १० बजेदेखि यातायात सञ्चालनमा आउने अनुमान गरिएको छ ।

सिद्धिचरण राजमार्गअन्तर्गत ओखलढुंगा–सल्लेरी खण्डमा सोलु खोलानजिक सडक अवरुद्ध भएको छ । सडक खुलाउन ढुंगा फुटाउने उपकरण, उत्खनन गर्ने मेसिन तथा माटो बोक्ने यन्त्र परिचालन गरिएको छ । थप वर्षा नभए बेलुकासम्म यातायात सहज बनाउने प्रयास भइरहेको छ ।

मध्यपहाडी राजमार्गअन्तर्गत निसी गाउँपालिका–कानाबगर क्षेत्रमा सडक अवरुद्ध भएको छ । लेदो र पहिरो आउने क्रम जारी रहेकाले पहिरो पन्छाउने मेसिन तयारी अवस्थामा राखिएको छ । कालीगण्डकी करिडोरअन्तर्गत जैमिनी नगरपालिका–४ बेलबगरमा सडक अवरुद्ध भएको छ । ठूलो पहिरो खसेपछि पहिरो हटाउन मेसिन तयारी अवस्थामा राखिएको सडक विभागले जनाएको छ । त्यस्तै, बागलुङ–बेनी सडकअन्तर्गत म्याग्दी क्षेत्रमा सडक अवरुद्ध भएको छ । पहिरो हटाउन मेसिन परिचालन भइसकेको छ ।

तमोर करिडोरअन्तर्गत उकुवा खोला, नावा खोला र रानीगाउँ क्षेत्रमा सडक अवरुद्ध भएको छ । खोलामा पानीको बहाव कम भएपछि सडक खुलाउने प्रयास गरिने जनाइएको छ । राप्ती राजमार्गअन्तर्गत कपुरकोट–खरखोला क्षेत्रमा सडक अवरुद्ध भएको छ। पहिरो हटाउने काम भइरहेको छ ।

कर्णाली राजमार्गअन्तर्गत गगने खोला, नाग्म–गुम्राको रोँका क्षेत्र, बाँझेसिमल–दैलेखोला तथा हारेनजिक विभिन्न स्थानमा साना–ठूला पहिरो तथा ढुंगा खसेका छन् । पहिरो पन्छाउने काम जारी रहेको र हरेक स्थानमा पहिरो पन्छाउने टोली परिचालन गरिएको सडक विभागले जनाएको छ ।

भालुवाङ–चाकचके–लिवाङ सडकका विभिन्न स्थानमा पनि आंशिक अवरोध रहेको छ । सवारीसाधनलाई सावधानीपूर्वक सञ्चालन गर्न आग्रह गरिएको छ भने मेसिन परिचालन गरी पहिरो तथा ढुंगा हटाउने काम भइरहेको सडक विभागले जानकारी दिएको छ ।