३४ दिनमै सरकारको ढुकुटीमा १ खर्बभन्दा बढी राजस्व, ‘मिसन १६ खर्ब’को सुरुवात

काठमाडौँ: चालु आर्थिक वर्ष २०८३/८४ सुरु भएको ३४ दिनमै सरकारले एक खर्ब रुपैयाँभन्दा बढी राजस्व संकलन गरेको छ ।

 महालेखा नियन्त्रक कार्यालयका अनुसार आर्थिक वर्षको पहिलो ३४ दिनमा सरकारको ढुकुटीमा एक खर्ब रुपैयाँभन्दा बढी राजस्व जम्मा भएको हो ।

कुल राजस्वमध्ये भन्सार महसुलबाट १४.५५ प्रतिशत, अन्तःशुल्कबाट १५.४६ प्रतिशत र आयकरबाट २२.१७ प्रतिशत संकलन भएको छ ।

त्यस्तै, मूल्य अभिवृद्धि कर (भ्याट) बाट ३४.०४ प्रतिशत र अन्य शीर्षकबाट १३.७८ प्रतिशत राजस्व संकलन भएको कार्यालयले जनाएको छ ।

सरकारले चालु आर्थिक वर्षमा १५ खर्ब ८० अर्ब रुपैयाँ राजस्व संकलन गर्ने लक्ष्य राखेको छ । अर्थमन्त्री डा. स्वर्णिम वाग्लेले यसलाई ‘मिसन १६ खर्ब’ का रूपमा अघि बढाएका छन् ।

राजस्व चुहावट नियन्त्रण गर्दै लक्ष्य हासिल गर्न अर्थ मन्त्रालय मातहतका निकायलाई ‘मिसन मोड’मा काम गर्न अर्थमन्त्री वाग्लेले निर्देशन दिँदै आएका छन् ।

गत आर्थिक वर्षमा सरकारले १२ खर्ब ४९ अर्ब रुपैयाँ राजस्व संकलन गरेको थियो । यस वर्षको लक्ष्य गत वर्षको वास्तविक संकलनभन्दा ३ खर्ब ३१ अर्ब रुपैयाँ बढी हो।