पत्रपत्रिका वर्गीकरण र लोककल्याणकारी विज्ञापन वितरण व्यवस्थित बनाउन निर्देशन

काठमाडौँ: सूचना तथा सञ्चारमन्त्री डा. विक्रम तिमिल्सिनाले पत्रपत्रिका वर्गीकरण र लोककल्याणकारी विज्ञापन वितरण प्रणालीलाई पारदर्शी र व्यवस्थित बनाउन निर्देशन दिएका छन् ।

सूचना तथा प्रसारण विभाग र प्रेस काउन्सिल नेपालका अधिकारीसँगको छलफलमा एउटै व्यक्ति वा संस्थाका धेरै पत्रपत्रिकाले विज्ञापन लिने, वास्तविकभन्दा बढी प्रकाशन सङ्ख्या देखाउने तथा पेस गरिएको विवरण र वास्तविक प्रकाशनबीच फरक हुने समस्या उठाइएको थियो ।

मन्त्री तिमिल्सिनाले वास्तविक प्रकाशन तथा वितरण सङ्ख्या यकिन गर्ने प्रभावकारी प्रणाली बनाउन, वर्गीकरणका आधार स्पष्ट गर्न र सरकारी विज्ञापन वितरणमा हुने दोहोरोपन हटाउन निर्देशन दिएका छन् ।

छापा माध्यमसँगै अनलाइन तथा डिजिटल सञ्चारमाध्यमको विस्तार भइरहेकाले सबै माध्यमलाई समेट्ने एकीकृत वर्गीकरण प्रणालीको सम्भावना अध्ययन गर्न पनि मन्त्रालयले तयारी गरिरहेको जनाएको छ । साथै, प्रेस काउन्सिलको आर्थिक तथा प्रशासनिक काम पारदर्शी बनाउन र बेरुजु समयमै फर्छ्यौट गर्न निर्देशन दिइएको छ ।