कृषिमन्त्री चौधरीसँग चिनियाँ राजदुत माओमिङको भेटवार्ता

काठमाडौं: कृषि, वन तथा पर्यावरण मन्त्री गिता चौधरीसँग  नेपालका लागि चिनियाँ राजदूत झाङ माओमिङले भेटवार्ता गरेका छन् ।

शुक्रबार मन्त्रालयमा भएको भेटवार्तामा नेपाल–चीनबीच कृषि, पशुपन्छी, मत्स्य, वन तथा वातावरण क्षेत्रको सहकार्यलाई थप सुदृढ बनाउने विषयमा विस्तृत छलफल भएको छ । 

साथै कृषि आधुनिकीकरण तथा यान्त्रिकीकरण, द्विपक्षीय सम्झौताहरूको कार्यान्वयन, कृषि व्यापार प्रवद्र्धन, रोग नियन्त्रण, प्रविधि हस्तान्तरण र प्राविधिक सहयोग लगायत विषयमा छलफल भएको मन्त्रालयले जनाएको छ । 

मन्त्री चौधरीले उच्च मूल्यका नेपाली कृषि उत्पादनहरूको चिनियाँ बजारमा पहुँच विस्तार गर्न आवश्यक रहेको उल्लेख गर्दै यसका लागि चीन सरकारको सहयोग अपेक्षा गरेकी थिइन् । साथै ताप्लेजुङ सीमावर्ती क्षेत्रमा याक तथा चौँरीको आवागमनसँग सम्बन्धित समस्याको समाधानका लागि समेत चिनियाँ पक्षको सहयोग आवश्यक रहेको बताइन् । 

भेटमा चिनियाँ राजदूत माओमिङले नेपालको आर्थिक विकासमा चीनको निरन्तर सहयोग रहने प्रतिबद्धता व्यक्त गर्दै कृषि, वन, जलवायु परिवर्तन अनुकूलन, प्रविधि हस्तान्तरण, लगानी प्रवद्र्धन तथा मानव स्रोत विकासका क्षेत्रमा सहकार्य थप विस्तार गर्न चीन तयार रहेको बताएको मन्त्रालयले जनाएको छ ।