काठमाडौंका यी क्षेत्रमा आज ३ घण्टा विद्युत् कटौती हुँदै

काठमाडौँ, ३ माघ: नेपाल विद्युत् प्राधिकरणले महाराजगञ्ज वितरण केन्द्रअन्तर्गतका विभिन्न स्थानमा आज ३ घण्टा विद्युत् आपूर्ति बन्द गर्ने भएको छ । 

राष्ट्रपति भवन शीतल निवास क्षेत्रको वितरण प्रणालीलाई भूमिगत गर्ने र प्राविधिक उपकरण जडान गर्ने कार्यका लागि बिजुली कटौती गर्न लागिएको प्राधिकरणले जनाएको छ ।

प्राधिकरणका अनुसार बिहान ११ बजेदेखि दिउँसो २ बजेसम्म पानीपोखरी फिडरअन्तर्गतका साङ्ग्रिला होटल, लाजिम्पाट, महाराजगञ्ज, शिक्षण अस्पताल, शीतल निवास, बालुवाटार, चुनदेवी र पञ्चकन्या आसपासका क्षेत्रमा विद्युत् अवरुद्ध हुनेछ । यस्तै, नेपाल प्रहरीको केन्द्रीय अनुसन्धान ब्युरो (सीआईबी) र प्रहरी अस्पताल आसपासका क्षेत्रमा पनि सोही समयमा विद्युत् काटिनेछ ।

निर्धारित समयभन्दा अगावै काम सम्पन्न भएमा विद्युत् आपूर्ति तोकिएको समयभन्दा पहिल्यै सुचारु हुन सक्ने प्राधिकरणले जानकारी दिएको छ । विद्युत् आपूर्तिमा हुने असुविधाप्रति प्राधिकरणले क्षमायाचना समेत गरेको छ ।