देशका विभिन्न स्थानबाट जुवातास खेलिरहेका ३१ जना पक्राउ

काठमाडौँ : प्रहरीले भक्तपुर, ललितपुर र दार्चुलाबाट जुवातास खेलिरहेका ३१ जनालाई पक्राउ गरेको छ ।

भक्तपुरको सूर्यविनायक नगरपालिका-५ चुनदेवीबाट जुवातास खेलिरहेको अवस्थामा भक्तपुर सूर्यविनायक बस्ने रामेछाप मन्थली नगरपालिका-७ घर भएका ३२ वर्षीय कुशल मगर समेत १० जनालाई प्रहरीले पक्राउ गरेको छ । प्रहरी वृत्त जगातीबाट खटिएको प्रहरीले उनीहरूलाई नगद १ लाख ५२ हजार ४ सय रूपैयाँ र ३ बुक तास सहित पक्राउ गरेको हो । 

यसैगरी भक्तपुर, भक्तपुर नगरपालिका-८ च्यामासिंह बस्ने माईला मारीखुको घरमा जुवातास खेलिरहेको अवस्थामा चाँगुनारायण नगरपालिका-७ बागेश्वरी बस्ने ५१ वर्षीय नारथ कार्की समेत ७ जनालाई मंगलबार साँझ प्रहरीले पक्राउ गरेको छ । जिल्ला प्रहरी परिसर भक्तपुरबाट खटिएको प्रहरीले उनीहरूलाई ७३ हजार ७ सय २५ रूपैयाँ र ६ बुक तास सहित पक्राउ गरेको  हो ।

त्यस्तै ललितपुरको महालक्ष्मी नगरपालिका-२ आँगन पाटी प्यालेसको पछाडि रहेको टहरामा जुवातास खेलिरहेको अवस्थामा सोही नगरपालिका-१ इमाडोल बस्ने गोरखा घर भएका ३२ वर्षीय सुनिल क्षेत्री समेत ८ जनालाई प्रहरीले पक्राउ गरेको छ । प्रहरी वृत्त सातदोवाटोबाट र प्रहरी प्रभाग इमाडोलबाट खटिएको प्रहरीले उनीहरूलाई नगद ९८ हजार ४ सय ४७ रूपैयाँ र ८ बुक तास सहित पक्राउ गरेको हो । 

त्यसैगरी दार्चुलाको महाकाली नगरपालिका-४ नमुना टोल खलंङ्गा बजार बस्ने ४२ वर्षीय गौरव लाल चुनाराको घरमा जुवातास खेलिरहेको अवस्थामा गौरव समेत ६ जनालाई प्रहरीले पक्राउ गरेको छ । जिल्ला प्रहरी कार्यालय दार्चुलाबाट खटिएको प्रहरीले उनीहरूलाई नगद ७६ हजार ५ सय ८५ रूपैयाँ र ४ बुक तास सहित पक्राउ गरेको हो । 

 यस सम्बन्धमा प्रहरीले आवश्यक अनुसन्धान गरिरहेको छ ।