रौतहटमा आगलागी, रु १० लाख बराबरको क्षती

रौतहट, १९ चैत । रौतहटको दुई छुट्टाछुटै स्थानमा भएको आगलागीमा रु.१० लाख ३८ हजार बराबरको क्षती भएको छ । गरुडा नगरपालिका –५  मा रहेको ठाकुर ग्रिल उद्योगमा सोमबार बेलुका करिब ९ बजे तिर आगलागी भएको हो ।

आगलागीको घटनाका बारेमा जानकारी पाउनका साथ ईलाका प्रहरी कार्यालय गरुडाका प्रहरी निरीक्षक ओम प्रकाश यादवको नेतृत्वको टोलि खटिएको थियोे । सुरक्षाकर्मी , स्थानियबासी र  वरुण यन्त्र (दमकल ) सहयोगमा आगो करीब एक घण्टा नियन्त्रणमा आएको जिल्ला प्रहरी कार्यलय रौतहटका प्रवक्ता एवं डिएसपी दिपक कुमार रायले बताए ।

उनका अनुसार विधुत् तार सर्ट भएर आगोलागी भएको अनुमान गरिएको छ । आगोलागीबाट उद्योगमा रहेको टायर, वेल्डिङ मेसिन, मर्मतका लागी राखिएको ट्र्याक्टर लगायत जलेर क्षती पुगेको उनले जानकारी दिए । आगलागीबाट  कुनै प्रकारको मानवीय क्षती नभएको उनको भनाइ छ ।

आगलागीमा रु.१० लाख बराबरको क्षती भएको प्रहरीले जानकारी दिएको छ । यस्तै, इशनाथ नगरपालिका ६ जयनगर बस्ने शेख वसिर अख्तरको पक्की घरको एक कोठामा आगलागी भएको रौतहट प्रहरीले जनाएको छ । आगलागीबाट कोठामा रहेका टि.भी , पलङ र साइकल लगायत जलेर क्षती भएको प्रहरीको  भनाइ छ । घरको कोठामा मात्र आगलागी भएकाले करीब ३८ हजार बराबरको क्षती भएको जिल्ला प्रहरी कार्यलय रौतहटले जनाएको छ ।