स्ववियु निर्वाचन केन्द्रीत नेविसंघ कास्कीको रणनीतिक प्रतिनिधि परिचालन

पोखरा, १३ फागुन – नेपाल विद्यार्थी संघ कास्कीले त्रिभुवन विश्वविद्यालयअन्तर्गतका कलेजहरूमा स्ववियु (स्वतन्त्र विद्यार्थी युनियन) निर्वाचनको मिति तय भएपछि आफ्ना प्रतिनिधिहरू खटाएको छ।

नेविसंघ कास्कीका अध्यक्ष चुमन गुरुङका अनुसार, कलेजहरूमा रहेका समस्या, चुनौती तथा निर्वाचनको वातावरण बुझ्नका लागि प्रतिनिधिहरू परिचालन गरिएको हो। उनले विद्यार्थीहरूको हितमा काम गर्न नेविसंघ प्रतिवद्ध रहेको भन्दै, सबै विद्यार्थीहरूलाई स्ववियु निर्वाचनमा नेविसंघलाई पहिलो बनाउन अपिल गरेका छन्।

यस क्रममा उपसभापति बंशज खवास, प्रकाश गुरुङ र प्रकट खनालको नेतृत्वमा विभिन्न टोलीहरू गठन गरिएको छ। यी टोलीहरूले कलेजहरूमा विद्यार्थीहरूसँग संवाद गर्ने, उनीहरूको समस्या सुन्ने र निर्वाचनको तयारीबारे जानकारी लिने जिम्मेवारी पाएका छन्।

नेविसंघ कास्कीले त्रिवि अन्तर्गतका सम्पूर्ण कलेजहरूमा आफ्ना कार्यकर्ताहरू परिचालन गर्दै निष्पक्ष र पारदर्शी निर्वाचन सुनिश्चित गर्न जोड दिएको छ। साथै, नेविसंघमा आस्था राख्ने सम्पूर्ण विद्यार्थीहरूलाई आगामी स्ववियु निर्वाचनमा सक्रिय सहभागिता जनाइ संगठनलाई मजबुत बनाउने अपिलसमेत गरिएको छ।