धनुषामा स्कुल बसको ठक्करबाट बालिकाको मृत्यु

जनकपुरधाम – धनुषामा स्कुल बसको ठक्करबाट एक बालिकाको मृत्यु भएको छ।

बिहीबार बिहान करिब पौने १० बजेको समयमा बाल आवासीय माध्यमिक विद्यालयको ना १ क ९६९६ नम्बरको बसले ठक्कर दिँदा धनुषाधाम नगरपालिका–३ की ३ वर्षीया बालिकाको मृत्यु भएको इलाका प्रहरी कार्यालय धनुषाधामले जनाएको छ।

प्रहरीका अनुसार बसले धनुषाधाम बजारमै बालिकालाई ठक्कर दिएकोमा घाइते भएकी बालिकालाई उपचारको लागि जनकपुरधामस्थित प्रादेशिक अस्पतालमा पठाएकोमा १० बजेर २० मिनेटमा चिकित्सकले मृत घोषणा गरेका थिए।

बालिकालाई ठक्कर दिने स्कुल बस र चालक प्रहरीको नियन्त्रणमा रहेको तथा यस सम्बन्धमा थप अनुसन्धान भइरहेको इलाका प्रहरी कार्यालय धनुषाधामले जनाएको छ।