सहकारी ठगी काण्डमा छविलाल जोशीलाई आजबाट बयान लिईंदै

रुपन्देही । पूर्वडिआइजी छविलाल जोशीलाई बुटवलस्थित सुप्रिम सहकारीको निक्षेप अपचलन सम्बन्धी बयानका लागि रुपन्देही ल्याइएको छ । गोर्खा मिडिया नेटवर्कका तत्कालीन सञ्चालक छविलाल जोशीको आज रुपन्देहीमा बयान लिइँदै छ । पोखराबाट हवाई जहाजमार्फत सोमबार नै जिल्ला प्रहरी कार्यालय रुपन्देही लगिएको थियो  । उनी अहिले सोही जिप्रकामा छन् ।

जिल्ला प्रहरी कार्यालय रुपन्देहीका प्रवक्ता डिएसपी लक्ष्मी खनालका अनुसार सम्भवतः मंगलबार नै जोशीको बयान सकेर पोखरा पठाउन सकिने कुरा जानकारी गराइन् । प्रहरी अनुसन्धानमा सुप्रिम बहुउद्देश्यीय सहकारी संस्थाबाट झण्डै १४ करोड रकम गोर्खा मिडिया नेटवर्कको खातामा गएको देखिएको छ । प्रतिनिधिसभा सदस्य सूर्य थापा नेतृत्वको गठित संसदीय छानबिन विशेष समितिको सिफारिस कार्यान्वयनका क्रममा असोज ६ गते जोशी काठमाडौँबाट पक्राउ परेका थिए ।

पोखराको सूर्यदर्शन सहकारीको रकम ठगीमा हिरासतमा रहेका जोशी बुटवलको सुप्रिम सहकारीमा समेत मुछिएको आरोप छ । संसदीय छानबिन समितिले जोशीसहितका व्यक्तिलाई सहकारी ठगी प्रकरणमा कारबाही गर्न सिफारिस गरेको थियो । सोही प्रकरणमा राष्ट्रिय स्वतन्त्र पार्टी (रास्वपा) का सभापति रवि लामिछाने पनि अहिले पोखरा प्रहरीको हिरासतमा छन् ।