नवरात्रको सातौँ दिन आज घर घरमा फूलपाती भित्र्याइँदै

आश्विन शुक्ल सप्तमीका दिन आज अपराह्न घरघरमा शास्त्रीय विधिअनुसार शुभ साइतको प्रतीक फूलपाती भित्र्याएर मनाइँदैछ ।

घटस्थापनाका दिनदेखि वैदिक विधिपूर्वक दुर्गालाई आह्वान गरी पूजाआजा गरिएको दसैँ घर अथवा पूजाकोठामा शुभ साइतको प्रतीकका रूपमा उखु, हलेदो, केराको बोट, धानको बाला, बेलपत्र, दारिम, जयन्ती, अशोकको फूल र मानवृक्ष भित्र्याउने गरिन्छ ।

फूलपातीलाई नौवटी देवीको प्रतीकको रूपमा भित्र्याई शास्त्रीय विधिअनुसार शक्तिको आराधनाका साथ पूजा गर्ने वैदिक विधि रहेको छ।  

केरालाई ब्रह्मायणी, दारिमलाई रक्तदन्तिका, धानलाई लक्ष्मी, हलेदोलाई दुर्गा, मानवृक्षलाई चामुण्डा, उखुलाई कालिका, बेलपत्रलाई शिवा, अशोकलाई शोकरहिता र जयन्तीलाई कात्तिकी देवीको रुपमा आह्वान गरी पूजा गरिन्छ, यी देवी नवदुर्गाका प्रतिकहरू हुन्। 

आजकै दिन गोरखा दरबारबाट फूलपाती ल्याएर काठमाडौँको हनुमानढोका दसैँ घरमा भित्र्याउने र सैनिक मञ्च टुँडिखेलमा राष्ट्रप्रमुख र सरकार प्रमुखको उपस्थितिमा नेपाली सेनाले फूलपाती बढाइँ गर्ने प्रचलन पनि रहेको छ।