उद्धार र राहतमा तीव्रता दिन चिनियाँ राष्ट्रपति सीको निर्देशन

काठमाडौं: चीनको तिब्बत स्वायत्त क्षेत्रको दक्षिणपश्चिमी भागमा रहेको केरूङ्ग सीमा नाकामा बुधबार बिहान पहिरो जाँदा केही मानिस हताहत भएको जनाइएको छ।

चिनियाँ राष्ट्रपति सी चिनफिङले पहिरोमा परी बेपत्ता भएकाहरूको खोजी तथा उद्धारलाई तीव्रता दिन र राहत तथा उद्धारका सबै सम्भव प्रयास गर्न निर्देशन दिएका छन्।

चिनियाँ सञ्चारमाध्यम CGTN का अनुसार, नेपालतर्फबाट आएको पहिरोका कारण जिरोङ सीमा नाकामा क्षति पुगेको हो। घटनापछि स्थानीय प्रशासन तथा उद्धार टोलीलाई तत्काल परिचालन गरिएको छ।

राष्ट्रपति सीले बेपत्ता व्यक्तिहरूको खोजी, घाइतेहरूको उपचार तथा प्रभावित क्षेत्रमा राहत व्यवस्थापनलाई प्राथमिकतामा राख्न निर्देशन दिएका छन्। घटनाको विस्तृत क्षति तथा मानवीय अवस्थाबारे थप विवरण आउन बाँकी छ।

जिरोङ सीमा नाका नेपाल–चीनबीचको महत्वपूर्ण स्थलमार्गमध्ये एक हो। पहिरोका कारण सीमा क्षेत्रमा आवागमन तथा अन्य गतिविधिमा समेत असर परेको हुन सक्ने बताइएको छ।