बच्चा लिएर युरोपेली सङ्घका जलवायु मन्त्रीहरूको बैठकमा सहभागी स्विडिस मन्त्री चर्चामा

काठमाण्डौ, १४ अषाढ़ । स्विडेनकी जलवायु मन्त्री रोमिना पोरमोख्तारी आफ्नो तीन महिनाका छोरा एडमलाई काखमा बोकेर युरोपेली सङ्घका जलवायु मन्त्रीहरूको बैठकमा सहभागी भएपछि उनको तस्बिर र भिडियो विश्वभर चर्चाको विषय बनेको छ ।

सामाजिक सञ्जालमा भाइरल भएको भिडियोमा उनी छोरालाई काखमा लिएर बैठकमा सहभागी हुँदै आफ्ना धारणा राखिरहेको देखिन्छ । युरोपेली सङ्घको मन्त्रीस्तरीय बैठकमा यति सानो शिशुको सहभागिता भएको यो पहिलो घटना मानिएको छ ।

३० वर्षीया पोरमोख्तारीले आफूले यस्तो कदम जानाजानी चालेको बताएकी छन् । उनका अनुसार आमा बन्नु भनेको कुनै महिलाको व्यावसायिक यात्रा रोकिनु होइन भन्ने सन्देश दिनका लागि उनले छोरालाई बैठकमा सँगै ल्याएको बताएकी छन् ।

उनले महिलालाई परिवार र पेशामध्ये कुनै एक रोज्न बाध्य पारिनु नहुने बताइन् । अनुकूल वातावरण र आवश्यक सहयोग भए परिवार र सार्वजनिक जिम्मेवारी दुवैलाई सँगसँगै अघि बढाउन सकिने उनको भनाइ छ ।

पोरमोख्तारीका अनुसार राजनीतिक नेतृत्वमा रहेका महिलामाथि विशेषगरी परिवार र काममध्ये एकलाई मात्र प्राथमिकता दिनुपर्ने धारणा थोपर्ने गरिन्छ । आफू भने यस्तो सोचसँग सहमत नरहेको उनले स्पष्ट पारिन् । उनले कार्यस्थल र सरकारी संस्थाहरूलाई पनि अझ लचिलो बनाउनुपर्ने आवश्यकता औँल्याइन् । यसो भए अभिभावकहरूले पारिवारिक जिम्मेवारी पूरा गर्दै सार्वजनिक दायित्व पनि प्रभावकारी रूपमा निर्वाह गर्न सक्ने उनको विश्वास छ ।

पोरमोख्तारी हालै मातृत्व बिदाबाट काममा फर्किएकी हुन् । उनका पति भने सेप्टेम्बरमा हुने निर्वाचनसम्म बिदामा रहेकाले छोराको हेरचाहका लागि उनीसँगै लक्जेम्बर्ग पुगेका थिए ।

इरानी मूलको परिवारमा स्टकहोमको उपनगरीय क्षेत्रमा जन्मिएकी पोरमोख्तारी सन् २०२२ मा मन्त्री नियुक्त हुँदा स्विडेनकै सबैभन्दा कम उमेरकी मन्त्री बनेकी थिइन् । कम उमेरमा यो जिम्मेवारी सम्हाल्दै उनले यसअघिको कीर्तिमानसमेत तोडेकी थिइन् ।