पाकिस्तानका गृहमन्त्री इरानमा, अमेरिकी प्रस्ताव बारे छलफल

एजेन्सी, ०७ जेठ । इरानले आफ्नो नयाँ प्रस्तावबारे अमेरिकाबाट आएको प्रतिक्रियाको समीक्षा भइरहेको जनाएको छ । इरानी समाचार संस्था नूरका अनुसार वासिङ्टन र तेहरानबीच प्रस्तावित युद्धविरामसम्बन्धी दस्तावेजमा छलफल जारी रहेको छ ।

इरानको विदेश मन्त्रालयका प्रवक्ता इस्माइल बाघाएईले इरानले अघि सारेको १४ बुँदे प्रस्तावका आधारमा दुवै पक्षबीच पटक–पटक सन्देश आदानप्रदान भएको बताएका छन् । उनले अमेरिकी पक्षबाट प्राप्त धारणा अध्ययन भइरहेको जानकारी दिएका छन् ।

उनले उक्त प्रतिक्रिया पाकिस्तानका गृहमन्त्री मोहसिन नाक्वीको इरान भ्रमणका क्रममा दिएका हुन् । पाकिस्तानी गृहमन्त्री नाक्वीले इरानका राष्ट्रपति मासोउद पेजेशकियानसँग तेहरानमा भेटवार्ता गरेका थिए । करिब ९० मिनेट चलेको भेटमा क्षेत्रीय सुरक्षा अवस्था, इरान–अमेरिका तनाव तथा दुई देशबीचको सम्बन्धका विषयमा छलफल भएको बताइएको छ ।

इरानी र पाकिस्तानी सञ्चारमाध्यमका अनुसार बैठकमा मध्यपूर्व क्षेत्रमा बढ्दो तनाव तथा इरान–अमेरिका वार्ता पुनः सुरु गर्ने सम्भावनाबारे पनि कुराकानी भएको थियो । यसका साथै द्विपक्षीय सम्बन्ध, सीमा सुरक्षा तथा क्षेत्रीय शान्तिसम्बन्धी विषयमा समेत दुवै पक्षबीच छलफल भएको जनाइएको छ ।