भारतका चार राज्य र एक केन्द्रशासित प्रदेशको निर्वाचनको मतगणना आज

काठमाण्डौ, २१ वैशाख । भारतका चार राज्य र एक केन्द्रशासित प्रदेशमा सम्पन्न प्रदेशसभा निर्वाचनको मतगणना आज सुरु हुँदैछ । पश्चिम बंगाल, तमिलनाडु, असम, केरल र पुडुचेरीका नतिजा आज सार्बजनिक हुन लागेको हो ।

भारतको निर्वाचन आयोगका अनुसार मतगणनाका सबै तयारी पूरा भइसकेका छन् र कडा सुरक्षा व्यवस्थाबीच बिहान ८ बजेदेखि मतगणना सुरु हुनेछ । सुरुमा हुलाकमार्फत आएका मतपत्र गणना गरिनेछ भने त्यसपछि विद्युतीय मतदान मेसिनका मत गनिनेछन् । प्रारम्भिक नतिजा दिउँसोसम्म आउने अनुमान गरिएको छ ।

निर्वाचन सम्पन्न भएसँगै सबै राजनीतिक दलहरूले आ–आफ्नो जितको दाबी गरेका छन्। तर वास्तविक अवस्था मतगणनापछि मात्र स्पष्ट हुनेछ । दलहरूबीच कडा प्रतिस्पर्धा हुने अपेक्षा गरिएको छ । मतगणनाको एक दिनअघि दलहरूले सम्भावित राजनीतिक अवस्था समीक्षा गर्दै आन्तरिक बैठकसमेत गरेका थिए ।

पश्चिम बंगालमा सबैभन्दा कडा प्रतिस्पर्धा देखिएको छ । त्यहाँ अन्तिम समयसम्म चुनावी गतिविधि तीव्र बनेको थियो ।

तमिलनाडुमा द्रमुक नेतृत्वको गठबन्धन बलियो अवस्थामा रहेको अनुमान गरिएको छ । उच्च मतदान र प्रारम्भिक सर्वेक्षणहरूले यसलाई समर्थन गरेका छन् । विदुथलै चिरुथैगल कच्चीका प्रमुख थोल तिरुमावलवनले द्रमुक गठबन्धनले स्पष्ट बहुमत ल्याउने दाबी गरेका छन् । यहाँ तीन तहको सुरक्षा व्यवस्थासहित मतगणनाको तयारी पूरा गरिएको छ ।

असममा भारतीय जनता पार्टीले आफ्नो कार्यकालका उपलब्धिका आधारमा पुनः सत्ता कायम गर्ने अपेक्षा राखेको छ । केन्द्रीय मन्त्री पियुष गोयलले असम र पुडुचेरीमा भाजपा विजयी हुने विश्वास व्यक्त गरेका छन् । विपक्षी दलहरूले भने भ्रष्टाचारका मुद्दा उठाउँदै कांग्रेसको पुनरागमन हुने दाबी गरेका छन् । असममा महिलाको मतदान प्रतिशत पुरुषभन्दा बढी रहेको छ, जसले नतिजामा प्रभाव पार्न सक्ने बताइएको छ ।

केरलमा सत्तारुढ वामपन्थी लोकतान्त्रिक मोर्चा लगातार दोस्रो कार्यकालका लागि प्रयासरत छ । तर प्रारम्भिक सर्वेक्षणहरू विभाजित देखिएका छन् र कांग्रेस नेतृत्वको संयुक्त लोकतान्त्रिक मोर्चाले सत्ता फर्काउने आशा राखेको छ । कांग्रेस नेता इमरान प्रतापगढीले पाँचै क्षेत्रमा भाजपा सरकार बनाउन नसक्ने दाबी गरेका छन् । उच्च मतदान र महिलाको सक्रिय सहभागिताले केरलको राजनीतिक वातावरण थप चासोपूर्ण बनेको छ ।

पुडुचेरीमा पनि कडा प्रतिस्पर्धा देखिएको छ । भारतीय जनता पार्टी नेतृत्वको राष्ट्रिय लोकतान्त्रिक गठबन्धन आफ्नो स्थिति मजबुत बनाउन प्रयासरत छ भने कांग्रेस–द्रमुक गठबन्धन पुनरागमनको लक्ष्यमा छ । यहाँ पनि उल्लेखनीय रूपमा उच्च मतदान भएको छ ।

यस निर्वाचनमा उच्च मतदान, कडा सुरक्षा व्यवस्था र प्रत्यक्ष प्रसारणजस्ता प्रविधिको प्रयोगले निर्वाचन प्रक्रिया थप विकसित भएको संकेत दिएको छ ।