भारत पूर्ण रूपमा नक्सलमुक्त भएको गृहमन्त्री अमित शाहको घोषणा

भारतका केन्द्रीय गृह मन्त्री अमित शाहले देश पूर्ण रूपमा नक्सलवाद (वामपन्थी उग्रवाद) बाट मुक्त भएको औपचारिक घोषणा गरेका छन्। 

सोमबार लोकसभामा विशेष सम्बोधन गर्दै शाहले प्रधानमन्त्री नरेन्द्र मोदीको सरकारले निर्धारण गरेको ३१ मार्च २०२६ को समयसीमाभित्रै नक्सलवादलाई जरैदेखि उखेलेर फ्याँक्न सफल भएको दाबी गरे।

मन्त्री शाहका अनुसार नक्सलवादीहरूको शीर्ष नेतृत्व, केन्द्रीय समिति र पोलिटब्युरो संरचना पूर्ण रूपमा ध्वस्त पारिएको छ। विगत तीन वर्षमा सुरक्षा कारबाहीका क्रममा ७०६ नक्सलवादी मारिएका छन् भने ४,८३९ जनाले आत्मसमर्पण गरेका र २,२१८ जना पक्राउ परेका छन्। "हिजोको 'रेड करिडोर' अब विकासको करिडोरमा परिणत भएको छ," शाहले भने।

विशेष गरी छत्तीसगढको बस्तर क्षेत्रमा दशकौँदेखि रहेको 'लाल आतंक' समाप्त भएको उल्लेख गर्दै उनले अब त्यहाँका गाउँ-गाउँमा विद्यालय, अस्पताल, रासन पसल र सडक सञ्जाल पुगेको जानकारी दिए। शाहले नक्सलवाद गरिबीका कारण नभई एक विदेशी विचारधाराका कारण फैलिएको तर्क गर्दै यसले गरिब आदिवासीहरूलाई विकासबाट वञ्चित राखेको बताए।

सम्बोधनका क्रममा शाहले मुख्य विपक्षी दल कांग्रेसमाथि कडा प्रहार गर्दै विगत ६० वर्षको शासनकालमा नक्सलवादलाई नियन्त्रण गर्नुको सट्टा राजनीतिक स्वार्थका लागि प्रश्रय दिएको आरोप लगाए। उनले भने, "यो मोदी सरकार हो, यहाँ हतियार उठाउनेले कडा परिणाम भोग्नुपर्छ। हामी वार्ताका लागि सधैँ तयार थियौँ, तर केवल उनीहरूसँग जसले हतियार त्यागेर मूलधारमा आउन चाहे।"

यो ऐतिहासिक सफलताको श्रेय उनले केन्द्रीय सशस्त्र प्रहरी बल (CAPF), कोब्रा कमाण्डो, सीआरपीएफ र स्थानीय राज्य प्रहरीहरूलाई दिए। सरकारले नक्सलमुक्त भएका गाउँहरूको विकासका लागि प्रतिगाउँ १ करोड रुपैयाँ अनुदान दिने र आत्मसमर्पण गर्नेहरूका लागि आकर्षक पुनर्स्थापना प्याकेज ल्याएको पनि उनले उल्लेख गरे। ३१ मार्च २०२६ को यो दिनलाई भारतको आन्तरिक सुरक्षाको इतिहासमा एक स्वर्णिम अध्यायको रूपमा हेरिएको छ।