इरानका गुप्तचर मन्त्रीको मृत्यु भएको पुष्टि

एजेन्सी, ०५ चैत्र । इरानका गुप्तचर मन्त्री इस्माइल खातिबको मृत्यु भएको पुष्टि भएको छ ।

राष्ट्रपति मसूद पजश्कियानले शोक व्यक्त गर्दै खातिबसहित वरिष्ठ नेता अली लारिजानी र रक्षामन्त्री अजीज नासिरजादेहको हत्या भएको बताएका छन् । साथै उनीहरूसँगै रहेका परिवारका सदस्य र अन्य व्यक्तिको मृत्युले देश शोकमा डुबेको उल्लेख गरेका छन् ।

यसअघि इजरायलले हवाई आक्रमणमा खातिब मारिएको दाबी गरेको थियो । इजरायली सेनाका अनुसार तेहरानमा लक्षित आक्रमण गरी उनलाई निशाना बनाइएको थियो ।

इजरायलले खातिब नेतृत्वको गुप्तचर मन्त्रालयले सरकारका दमनकारी गतिविधिमा भूमिका खेलेको आरोप लगाएको छ । हालका प्रदर्शनहरू दबाउन र प्रदर्शनकारीलाई पक्राउ तथा हत्या गर्न उनी संलग्न रहेको दाबी पनि गरिएको छ ।

इजरायलका रक्षामन्त्रीले पनि खातिब मारिएको पुष्टि गर्दै पछिल्लो आक्रमणलाई इरानका उच्च तह अधिकारीविरुद्धको कारबाहीको निरन्तरता बताएका छन् । यसले इरानको सुरक्षा संयन्त्रमा ठूलो असर परेको दाबी गरिएको छ ।

इस्माइल खातिब सन् १९६१ मा जन्मिएका थिए । उनले धार्मिक शिक्षासँगै सुरक्षासम्बन्धी क्षेत्रमा लामो समय काम गरेका थिए । इरान-इराक युद्धका क्रममा उनले गुप्तचर क्षेत्रमा भूमिका सुरु गरेका थिए र क्रमशः उच्च पदसम्म पुगेका थिए ।

उनी सन् २०२१ मा गुप्तचर मन्त्री नियुक्त भएका थिए । पछि सन् २०२२ मा अमेरिकाले साइबर गतिविधिमा संलग्न रहेको आरोपमा उनीमाथि प्रतिबन्ध समेत लगाएको थियो ।