इरानद्वारा विश्वभर तेल र ग्यास आपूर्तिको मुख्य मार्ग हर्मुज बन्द

एजेन्सी, १७ फाल्गुण । इरानले विश्वकै महत्वपूर्ण समुद्री मार्ग मानिने होर्मुज जलडमरु मध्य बन्द गरेको घोषणा गरेको छ ।

इरानको रिभोल्युशनरी गार्ड्सले खाडी क्षेत्रमा सञ्चालनमा रहेका जहाजहरूलाई उच्च आवृत्तिको रेडियो सन्देश पठाउँदै उक्त समुद्री मार्ग प्रयोग नगर्न चेतावनी दिएको जनाएको छ ।

होर्मुज जलडमरु मध्यलाई विश्वभर तेल र ग्यास आपूर्तिको मुख्य मार्गका रूपमा लिइन्छ । यो साँघुरो समुद्री बाटोले फारसको खाडीलाई ओमानको खाडी हुँदै अरब सागरसँग जोड्ने काम गर्छ ।

यस जलमार्गको उत्तरतर्फ इरान रहेको छ भने दक्षिणतर्फ ओमान र संयुक्त अरब इमिरेट्स रहेका छन् । वरिपरि प्रमुख तेल उत्पादक देशहरू रहेकाले विश्वका धेरै देशमा जाने तेल आपूर्ति यही मार्गबाट हुने गर्दछ ।

करिब १६७ किलोमिटर लामो रहेको होर्मुज जलडमरु मध्यका दुवै प्रवेशद्वार झण्डै ५० किलोमिटर चौडा छन् भने सबैभन्दा साँघुरो भाग करिब ३३ किलोमिटर मात्रै रहेको छ । जहाज आवतजावतका लागि करिब ३ किलोमिटर चौडाइको निश्चित समुद्री मार्ग तय गरिएको छ ।

इरानको यस निर्णयपछि अन्तर्राष्ट्रिय ऊर्जा आपूर्ति र समुद्री व्यापारमा असर पर्ने देखिएको छ ।