बंगलादेशमा बीएनपी पार्टीलाई बहुमत

काठमाण्डौ, ०१ फाल्गुण । बंगलादेशमा बंगलादेश राष्ट्रवादी पार्टी (बीएनपी) पार्टीले अत्यधिक बहुमत हासिल गरेको छ ।

विहिबार सम्पन्न निर्वाचनमा बीएनपीले अहिलेसम्म १८१ सिट जितेको छ । ३०० सदस्यीय तल्लो सदनमा बीएनपीले अहिलेसम्म ६० प्रतिशत भन्दा बढी सिट जितेको छ ।

चुनावको नतिजाले पूर्व प्रधानमन्त्री खालिदा जियाका छोरा तथा बीएनपी अध्यक्ष तारिक रहमान प्रधानमन्त्री बन्ने लगभग निश्चित देखिएको छ । रहमानले दुई सिटमा चुनाव लडे र दुवैमा जित हासिल गरेका छन् । उनी १७ वर्षपछि गत डिसेम्बरमा देश फर्किएका थिए ।

बंगलादेशको मिडिया डेली स्टारका अनुसार अहिलेसम्म २४९ स्थानको मतगणना सम्पन्न हुदा बीएनपीले १८१ स्थानमा जित हासिल गरेको छ भने जमात-ए-इस्लामीको नेतृत्वमा रहेको ११-दलीय गठबन्धनले अहिलेसम्म ६१ सिट मात्र जितेको छ ।

अन्य दल र स्वतन्त्र उम्मेदवारहरूले ७ सिट जितेका छन् । अझै ५० स्थानको नतिजा घोषणा हुन बाँकी रहेको छ । यस निर्वाचनमा ४८ प्रतिशत मतदान भएको थियो ।