ट्रम्पले नियुक्त गरे ग्रीनल्याण्डको राजदुत, क्षेत्रीय अखण्डताको सम्मान गर्न डेनमार्कको आग्रह

काठमाडौँ: अमेरिकी राष्ट्रपति डोनाल्ड ट्रम्पले ग्रीनल्याण्डको लागि अमेरिकी विशेष दूतको रूपमा लुइसियानाका गभर्नरलाई नियुक्त गर्ने घोषणा गरेका छन् ।

डोनाल्ड ट्रम्पले आफ्नो दोस्रो कार्यकालको सुरुमा ग्रीनल्याण्डलाई विलय गर्न आह्वान गरेका थिए । ग्रीनल्याण्ड हाल डेनमार्कको अर्ध-स्वायत्त क्षेत्र हो । खनिजले भरिपूर्ण ग्रीनल्याण्ड पनि रणनीतिक रूपमा महत्त्वपूर्ण छ । गत मार्चमा, उपराष्ट्रपति जेडी भान्सले ग्रीनल्याण्डमा रहेको अमेरिकी सैन्य अड्डा भ्रमण गरे र डेनमार्कलाई आफ्नो स्थितिलाई बेवास्ता गरेको आरोप लगाएका थिए ।

यसैबीच, अगस्टमा, डेनिश सरकारले अमेरिकी राजदूतलाई बोलाएर अमेरिकी राष्ट्रपति ट्रम्पसँग सम्बन्धित तीन व्यक्तिहरूलाई ग्रीनल्याण्डमा गोप्य अपरेशनहरू सञ्चालन गरेको आरोप लगाएको थियो । आइतबार, ट्रम्पले लुइसियानाका गभर्नर जेफ ल्यान्ड्रीलाई ग्रीनल्याण्डको लागि विशेष दूतको रूपमा नियुक्त गर्ने घोषणा गरेपछि यो विषय फेरी चर्चामा आएको छ । 

यस विषयमा डेनमार्कले अमेरिकासहित सबैले डेनमार्कको क्षेत्रीय अखण्डताको सम्मान गर्नुपर्ने बताएका छन् । 

डेनिस विदेशमन्त्री लार्स लोक्के रासमुसेनले भनेका छन्- 'यो नियुक्तिले ग्रीनल्याण्डमा अमेरिकी चासोको निरन्तरता पुष्टि गर्दछ। यद्यपि, हामी जोड दिन्छौं कि अमेरिका सहित सबै देशहरूले डेनमार्कको क्षेत्रीय अखण्डताको सम्मान गर्नुपर्छ ।'