टाइमको कभरमा आएपछि ट्रम्पको प्रतिक्रिया- अहिलेसम्मकै खराब तस्बीर राख्यो !

एजेन्सी, २९ असोज । अमेरिकी राष्ट्रपति डोनाल्ड ट्रम्पले टाइम पत्रिकाको आवरणमा रहेको आफ्नो तस्बिरप्रति असन्तुष्टि व्यक्त गर्दै यसलाई अहिलेसम्मकै सबैभन्दा खराब तस्बिर भनेका छन् ।

ट्रम्पले आफ्नो असन्तुष्टि व्यक्त गर्दै टाइमले उनको बारेमा राम्रो लेख लेखेको भएपनि सायद अहिलेसम्मकै सबैभन्दा खराब तस्बिर प्रकाशित गरेको बताएका हुन् । ट्रम्पले भनेका छन्- 'फोटोमा मेरो कपाल गायब भएको छ र उनको टाउकोमाथि सानो मुकुट जस्तो अनौठो तैरिरहेको वस्तु राखिएको छ । यो धेरै अनौठो छ ।' ट्रम्पले अगाडी भनेका छन्- 'मलाई तलबाट खिचिएका तस्बिरहरू कहिल्यै मन परेन, तर यो धेरै नराम्रो तस्बिर हो र यो भन्न आवश्यक छ,  ताकि उनीहरूलाई थाहा होस्, उनीहरू के गरिरहेका छन् ।'

टाइम पत्रिकाको आवरणमा रहेको तस्बिरमा राष्ट्रपति ट्रम्प आत्मविश्वासका साथ अगाडि हेरिरहेको देखाइएको छ, र शीर्षक 'उनको विजय' भनेर लेखिएको छ । यो लेखक एरिक कोर्टेल्साद्वारा लेखिएको थियो । यसलाई मध्य पूर्वमा ट्रम्पको विजयको रूपमा चित्रण गरिएको छ ।

टाइमले आफ्नो आर्टिकलमा लेखेको छ-

ट्रम्पले सधैं विश्वास गरेका छन् कि कुनै पनि समस्या 'द आर्ट अफ द डिल' मार्फत समाधान गर्न सकिन्छ । उनले १९८७ मा त्यही नामको एउटा पुस्तक पनि लेखेका थिए । ट्रम्प दृढ विश्वास गर्छन्, हरेक द्वन्द्व, जतिसुकै जटिल भए पनि, वार्ताबाट समाधान गर्न सकिन्छ । ट्रम्पले यसलाई व्यवसायमा र त्यसपछि राजनीतिमा अभ्यास गरेका छन् ।

त्यसकारण, जब उनले आफ्नो दोस्रो कार्यकालको सबैभन्दा चुनौतीपूर्ण कार्यहरू मध्ये एक, इजरायल र हमासबीचको गाजा युद्ध अन्त्य गर्ने कुरामा ध्यान केन्द्रित गरे, उनले कुनै पनि कूटनीतिज्ञ वा जनरलको सहयोग लिएनन् । बरु, ट्रम्पले आफ्नो भाषा बोल्ने दुई व्यक्तिहरूलाई छनोट गरे, स्टीव विटकफ, एक घर जग्गा व्यवसायीबाट विशेष दूत बनेका र उनका ज्वाइँ जारेड कुशनर, जसको मध्य पूर्वमा उल्लेखनीय प्रभाव छ । यो इजरायल-हमास सम्झौता ट्रम्पको दोस्रो कार्यकालको प्रमुख उपलब्धि बन्न सक्छ । यो मध्य पूर्वको लागि पनि ठूलो परिवर्तन साबित हुन सक्छ ।