फहलगाम आतङ्ककारी हमलाको कारण भारतीय खेलाडीले मिलाएनन् हात पाकिस्तानीसङ्ग

काठमाडौँ । एसिया कप अन्तर्गत भारतले पाकिस्तानलाई पराजित गर्यो । दुबई अन्तर्राष्ट्रिय रंगशालामा खेलिएको खेलमा भारतले २५ बल बाँकी रहँदा पाकिस्तानलाई सात विकेटले पराजित गर्‍यो र चालू प्रतियोगितामा लगातार दोस्रो जित दर्ता गर्‍यो ।

खेलमा कप्तान सूर्यकुमार यादवले छक्का प्रहार गर्दै टोलीलाई जित दिलाए । यसपछि उनी सिधै पभिलियन फर्किए । उनले पाकिस्तानी खेलाडीहरूसँग हात मिलाएनन् । बाँकी खेलाडीहरूले पनि त्यस्तै गरे ।

पाकिस्तानका कप्तान सलमान अली आगा खेलपछि पुरस्कार समारोहमा उपस्थित भएनन् । उनका प्रशिक्षक माइक हेसनले खेलपछिको पत्रकार सम्मेलनमा तनाव बढेको स्वीकार गरे । हेसनले भने- 'हामी हात मिलाउन चाहन्थ्यौं, तर विपक्षी टोलीले त्यसो नगरेकोमा निराश छौं । हामीले खेल्ने तरिकाबाट हामी निराश छौं, तर हामी हात मिलाउन चाहन्थ्यौं । सलमान खेलपछिको प्रस्तुतीकरणको लागि नआउनु कारण र त्यसैको प्रभाव थियो ।'  यसअघि पनि दुई कप्तानले टसको समयमा पनि हात मिलाएका थिएनन् ।

जितपछि भारतीय टी-२० कप्तान सूर्यकुमार यादवले एसिया कपमा पाकिस्तान विरुद्धको जित भारतीय सेनालाई समर्पित गरे । उनले भने- 'टोली पहलगाम आतंकवादी हमलामा मारिएकाहरूको परिवारको साथ छ ।'

भारत र पाकिस्तान बीचको खेललाई लिएर विवाद भएको र देशमा यो खेल बहिष्कार गर्ने माग भइरहेका बेला यो खेल खेलिएकाले यस अघि जस्तो भारत-पाकिस्तानबीचको खेलमा उत्साह देखिएको थिएन । सायद पहिलो पटक भारत पाकिस्तान क्रिकेट खेलमा स्टेडियममा सिट खाली देखिएको थियो ।

सूर्यकुमारले खेल पछि भने- 'म केही भन्न चाहन्छु र यो सही अवसर पनि हो । हामी पहलगाम आतंकवादी हमलामा मारिएकाहरूको परिवारसँग छौं र उनीहरूसँग हाम्रो ऐक्यबद्धता व्यक्त गर्दछौं । म यो जित हाम्रा सबै सशस्त्र सेनाहरूलाई समर्पित गर्दछु जसले धेरै बहादुरी देखाए । आशा छ कि उनीहरूले भविष्यमा हामीलाई प्रेरणा दिइरहनेछन् र जब पनि हामीले उनीहरूलाई खुशी पार्ने मौका पाउँछौं, हामी उनीहरूको अनुहारमा मुस्कान ल्याउँदै रहनेछौं ।'