फ्रान्समा सरकारविरुद्ध प्रदर्शन तिव्र

एजेन्सी, २६ भाद्र । फ्रान्समा सरकारविरुद्ध प्रदर्शन तिव्र भएको छ । बजेट कटौतीको विरोधमा र राष्ट्रपति इमानुएल म्याक्रोनको राजीनामाको माग गर्दै लाखौ मानिसहरू सडकमा उत्रिएको मिडिया रिपोर्टमा उल्लेख छ ।

सरकारले प्रदर्शन बढेपछि ८० हजारभन्दा बढी प्रहरी तैनाथ गरेको छ भने अहिलेसम्म २०० भन्दा बढी प्रदर्शनकारीलाई पक्राउ गरिएको छ ।

प्रदर्शनकारीले राष्ट्रपति म्याक्रोनका नीतिहरूको विरोध गरेका छन् । उनीहरुले जनताको ठूलो वर्गले म्याक्रोनका नीतिहरू आम जनताको हितविरुद्ध र धनी वर्गलाई फाइदा पुर्‍याएको आरोप लगाएका छन् ।

त्यस्तै सरकारले खर्च कटौती गरेर र कल्याणकारी योजनाहरू घटाएर आर्थिक सुधारहरू लागू गरेपछि अझ आक्रोस बढेको छ । यसले आम जनता, विशेष गरी मध्यम वर्ग र श्रमिक वर्गमाथि दबाब बढाएको छ । 

हालै सेबास्टियन लेकोर्नुलाई प्रधानमन्त्री बनाइएको छ । यो दुई वर्षभन्दा कम समयमा पाँचौं प्रधानमन्त्रीको नियुक्ति हो । यसले जनतामा अस्थिरता र असन्तुष्टि बढाएको छ । प्रदर्शनकारीहरू उनको नियुक्तिको सुरुवातदेखि नै सरकारमाथि दबाब दिन शुरु गरेका छन् ।

वामपन्थी गठबन्धन र तल्लो तहका संगठनहरूले देशमा भएका सबै कुराहरू रोकियोस् र सरकारलाई झुक्न बाध्य पारियोस् भन्दै आन्दोलन सुरु गरेका छन् । 

यी विरोध प्रदर्शनहरू फ्रान्सका नयाँ प्रधानमन्त्री सेबास्टियन लेकोर्नुले कार्यभार सम्हाल्न लागेका बेला भइरहेका छन् ।