अमेरिका र युरेपेली युनियनको व्यापार सम्झौतामा फ्रान्सको असन्तुष्टि

काठमाडौँ, १३ श्रावण । फ्रान्सले आइतबार अमेरिकी राष्ट्रपति डोनाल्ड ट्रम्प र युरोपेली संघका अध्यक्ष उर्सुला भोन डेर लेयन बीचको व्यापार सम्झौताको आलोचना गरेको छ । फ्रान्सेली प्रधानमन्त्री फ्रान्कोइस बेरोले यसलाई इयुको लागि कालो दिन भनेका छन् ।

बेरोले राष्ट्रपति ट्रम्पको बढ्दो ट्यारिफ दबाबको अगाडि इयु झुकेको टिप्पणी गरेका छन् । उनले भनेका छन्- 'स्वतन्त्र देशहरूको गठबन्धन, जुन उनीहरूको साझा मूल्य र हितको रक्षा गर्न निर्माण गरिएको थियो, दबाबमा झुक्दा यो दुःखद हुन्छ ।'

फ्रान्सका युरोपेली मामिला मन्त्री बेन्जामिन हदादले यस विषयमा इयुले स्पष्ट गर्नुपर्ने भन्दै यो ठिक नभएको बताएका छन् । त्यसैगरी फ्रान्सका व्यापार मन्त्री लरेन्ट सेन्ट मार्टिनले ट्रम्पले पावरको भाषा मात्र बुझ्ने भन्दै युरोपले पहिले सदस्य देशको राय लिएर सम्झौता गर्नुपर्नेमा त्यसो नगरेको बताएका छन् । यद्यपि, फ्रान्सेली राष्ट्रपति इमानुएल म्याक्रोन यस विषयमा मौन रहेका छन्।

अर्कोतर्फ जर्मन चान्सलर फ्रेडरिक मेर्ट्ज र इटालीका प्रधानमन्त्री जर्जिया मेलोनीले यस सम्झौताको स्वागत गरेका छन् । युरोपेली व्यापार आयुक्त मारोश सेफकोभिचले यसलाई 'ठूलो कदम' भनेका छन् ।

यस सम्झौता अन्तर्गत, युरोपबाट अमेरिका जाने धेरैजसो सामानहरूमा १५ प्रतिशत कर लगाइनेछ, जुन हालको ४.८ प्रतिशत भन्दा तीन गुणा बढी हो ।  सम्झौताको विवरण अनुसार, युरोपका ७० प्रतिशत सामानहरूमा १५ प्रतिशत कर लाग्ने भएको छ । यसमा कार, औषधि र इलेक्ट्रोनिक्स समावेश छन् ।

यद्यपि, विमानका पार्टपुर्जा, केही रसायन, अर्धचालक उपकरण र कर्क जस्ता केही कृषि उत्पादनहरूमा कुनै कर लाग्नेछैन। औषधिहरूमा अहिलेसम्म कुनै कर लाग्नेछैन तर भविष्यमा, यो १५ प्रतिशत भन्दा बढी हुनेछैन । आगामी तीन वर्षमा, इयुले अमेरिकाबाट ७५० अर्ब डलरको ऊर्जा किन्नेछ । साथै, इयुले अमेरिकामा ६०० अर्ब डलर लगानी गर्ने सहमति भएको छ ।