युक्रेनमा रुसको पछिल्लो आक्रमणमा २२ जनाको मृत्यु

काठमाडौँ : रुसले युक्रेनमा गरेको पछिल्लो आक्रमणमा कम्तिमा २२ जनाको मृत्यु भएको छ । 

युक्रेनी अधिकारीहरूका अनुसार दक्षिणपूर्वी युक्रेनको सीमावर्ती क्षेत्रमा अवस्थित जेलमा रूसी हवाई आक्रमणमा २२ जनाको मृत्यु भएको छ भने ४२ जना घाइते भएका छन् । जापोरिजियामा भएको रातभरको आक्रमणले नजिकैका घरहरूलाई पनि क्षति पुर्‍याएको छ । यस अवधिमा, रूसी सेनाले एयर-ग्लाइड बमबाट आठ आक्रमणहरू गरेको युक्रेनी अधिकारीहरुले बताएका छन् ।

युक्रेनका राष्ट्रपति भोलोडिमिर जेलेन्स्कीले जेलमा 'जानाजानी गरिएको आक्रमण' को निन्दा गरे र रूसलाई युक्रेनीहरूलाई मारेको आरोप लगाएका छन् ।

जापोरिजिया युक्रेनको चार पूर्वी क्षेत्रहरू मध्ये एक हो । रूसले २०२२ देखि यसलाई आफ्नो नियन्त्रणमा लिएको दाबी गरेको छ, यद्यपि यो क्षेत्र धेरै हदसम्म युक्रेनी नियन्त्रणमा छ । युक्रेनको न्याय मन्त्रालयले जेलमा चार बम विस्फोट भएको बताएको छ । भोजन कक्ष, प्रशासनिक मुख्यालय र क्वारेन्टाइन क्षेत्र ध्वस्त भएको छ ।

अमेरिकी राष्ट्रपति डोनाल्ड ट्रम्पले युक्रेनसँग सम्झौता गर्न रुसलाई १०-१२ दिनको नयाँ समय सीमा दिएपछि यो भिषण आक्रमण भएको छ ।

ट्रम्पले युक्रेनसँग सम्झौता गर्न रुसी राष्ट्रपति भ्लादिमिर पुटिनलाई दिइएको ५० दिनको समयसीमा घटाइएको बताएका थिए तर रुसले ट्रम्पको सो चेतावनीलाई बेवास्ता गरेको छ ।

ट्रम्पले पुटिनले रुससँग सम्झौता नगरेमा रुसलाई सतप्रतिशत कर लगाउने र अन्य प्रतिबन्ध लगाउने चेतावनी दिएका छन् । ट्रम्पले राष्ट्रपति बनेपछि पुटिनको प्रसंशा गर्दै युक्रेनी राष्ट्रपति भेलोदोमिर जेलेन्स्कीको आलोचना गरेका थिए । उनले ह्वाइटहाउसमै जेलेन्स्की अपमान समेत गरेका थिए । तर पुटिन युक्रेन युद्ध रोक्न सहमत नभएपछि अब ट्रम्पले कर लगाउने र प्रतिबन्धको चेतावनी दिएका छन् । त्यस्तै उनले युक्रेनलाई हतियारको सहयोग सुचारु गरेका छन् ।