सिनवारको मृत्युपछि अब हमासको नेतृत्व कसको हातमा ?

काठमाडौँ । गतवर्ष अक्टोबर ७ मा आम इजरायली जनताहरु आफ्नो पर्व सिम्हात तोराह मनाइरहेको अवस्थामा आतंककारी हमला भएको थियो, जहाँ झण्डै १२ सय सर्वसाधारण जनताहरु मारिएका थिए । उक्त हमलाको मुख्य योजनाकारको रुपमा चिनिएको उग्र चरमपन्थी नेता तथा हमास सैन्य दस्ताको कमाण्डर याह्या सिनवरको मृत्यु पश्चात अब नेतृत्त्व कसले गर्ने भन्ने विषय सर्वत्र चासो छ । त्यस्तै युद्दविराम हुने कि नहुने वा कुन शर्तमा हुने भन्ने विषय प्रति पनि चासो रहेको छ ।

अधिकारीहरुका अनुसार, हाल कतार बस्दै आएका र सिनवारका सहायक पनि रहिसकेका खलील अल हायाले प्रमुख पद सम्हाल्ने सम्भावना देखिन्छ । अधिकारीहरुको दाबी छ कि हाया नेतृत्त्व गर्ने, समन्वय गर्ने र युद्दविराको वार्ता गर्ने जस्ता कामहरुमा निपुण छन् ।

चरमपन्थी नेता सिनवार नेतृत्वमा भएकै कारण यसअघि युद्धविरामका लागि भएका प्रयासहरू असफल भएका थिए । तर हमासले भने सिनवारको मृत्युपछि पनि युद्धविरामका लागि सर्तहरूमा फेरबदल नहुने कुरा दोहोर्‍याएको छ । इजरायलको शर्त हमासले आत्मसमर्पण गर्नुपर्छ भन्ने छ भने हमासले गाजाबाट इजरायलीहरूको फिर्ता, शत्रुताको अन्त्य, मानवीय सहायता हस्तान्तरण, र युद्धग्रस्त क्षेत्रको पुनर्निर्माणको सर्त राख्दै आएको छ ।

सिनवार भन्दा अघि हमासको प्रमुख इस्मायल हानिया थिए । हानिया पनि गत जुलाईमा इजरायली सेनाको कार्यवाहीमा मारिएपछि हमासभित्र बलियो प्रभाव बनाएका सिनवार राजनीतिक प्रमुख चुनिन सफल भएका थिए । सन् २०१७ देखि गाजा स्ट्रिपमा हमास समूहका नेता रहेका सिनवार सर्वसम्मतिमा उक्त समूहको राजनीतिक विभाग नेतृत्व गर्ने जिम्मेवारी दिइएको थियो । आशा गरौँ  ! अब चयन हुने हमासको नेतृत्त्वले गाजा समस्याको समाधान गर्न सकारात्मक प्रयास गर्नेछ ।