सम्मानित व्यक्तिका अभद्र बोलीले राष्ट्रको छवि कमजोर

देशको उच्च ओहदामा रहेर काम गरिसकेका र कुटनीतिक विषयहरूलाई आफैले अनुभव समेत गरिसकेका माननीय/सम्माननीय व्यक्तिहरूले होस् गुमाइ बोल्दा देशको छवि कमजोर बन्दै गएको छ । 

नेपाल भूराजनैतिक जटिलता र सामरिक हिसाबले महत्वपुर्ण स्थानमा अवस्थित भएकोले हाम्रा छिमिकी मात्रै होइन संसारका अन्य शक्ति राष्ट्रहरूको पनि चाख हुनु स्वाभाविक हो । जसले गर्दा कतिपय अवस्थामा हामिले प्रत्यक्ष तथा अप्रत्यक्ष दवावहरुहरू खेप्दै आएका छौं । यस्ता दवावबाट बच्न हामीले हाम्रो मुलुकको बृहत्तर हितलाई केन्द्रमा राखेर कुटनैतिक सुझबुझ अपनाएर मात्रै छिमेकी लगायत अन्य शक्तिशाली मित्र राष्ट्रहरूसङ्ग सम्बन्धको खाका कोर्नुपर्दछ ।

तर देशको प्रधानमन्त्री भैसकेको व्यक्तिले नामै तोकेर विदेशी राष्ट्रको हस्तक्षेपलाई स्वीकार गर्नु, यस्ता विषयलाई राजनैतिक प्रतिशोधको बिषय बनाउनु साथै घरेलु राजनीतिको फोहोरी खेलझैं हल्का रुपले टिप्पणि गर्नु जायज होइन । यसले नेपालको अन्तराष्ट्रिय जगतमा छवि कमजोर बनाउनेमा दुईमत छैन । पछिल्लो समय हामीले अन्तर्राष्टृय जगतमा व्यापक क्षति भोग्दै आएका छौँ ।

तीन बर्ष अघि नेकपा माओवादी केन्द्रका अध्यक्ष पुष्पकमल दाहालले "आफुहरूको सरकार बने भारत र चीन दुबैका लागि कम्फर्टेबल हुने" बताएका थिए । आज तिनै माओवादी पार्टिका अर्का नेता अग्नि सापकोटा "बर्तमान ओली सरकारबाट भारत र चीन दुबै खुशी छैनन्" भनेर भन्दैछन । 

गत विहीवार भारतको अङ्ग्रेजी भाषाको अखबार 'दि हिन्दू' मा पूर्वप्रधानमन्त्री प्रचण्डले कूटनीतिक मर्यादा भुलेर अभिव्यक्ति दिएका छन् । उनले प्रधानमन्त्री ओलीको चीन भ्रमणलाई लक्षित गर्दै भारतभन्दा पहिले चीनको भ्रमण गर्न लागेर प्रधानमन्त्री केपी शर्मा ओलीले 'चाइना कार्ड' खेलेको आरोप लगाए ।

पुर्व प्रधानमन्त्री र पुर्व सभामुख जस्ता व्यक्तित्त्वहरुबाट राष्ट्रकै ओज घटाउने यस्ता अभिव्यक्ति खेदजनक छ । 

छिमेकी भएको नाताले चीन र भारत जस्ता शक्तिशाली देशहरुको नेपालमा आ-आफ्नै स्वाभाविक स्वार्थहरू हुन्छन्/छन् । उनीहरुका स्वार्थलाई हाम्रो राष्ट्रिय हितसङ्ग 'अलाइन' गर्न सक्नुपर्छ । त्यसको लागि राष्ट्रिय सहमतिको आधारमा उच्चस्तरीय राजनैतिक भेटघाट, छलफल र बौद्धिक विश्लेषकहरूको सुझावमा मुलुकको हितलाई केन्द्रमा राखेर औपचारिक कार्यक्रमहरू मार्फत संबोधन गर्नुपर्दछ । तर घरेलु राजनीतिमा एक दलले अर्को दललाई नंग्याएर गालि गलौज गरेजसरी मित्र राष्ट्रहरूसंगको सम्बन्धका विषयमा हल्का टिप्पणि देशका लागि पक्कै स्वस्थकर हुदैन ।