बैशाख २१ गते न्यूयोर्कमा नेपाली म्यूजिक एण्ड फिल्म अवार्ड

काठमाडौं: पहिलो पटक ‘टपसप काठमाडौं ८८४८ हिमालयन म्यूजिक फिल्म अवार्ड यूएसए’ आयोजना हुने भएको छ । 

मंगलबार एक कार्यक्रमकाबीच बैशाख २१ गते अमेरिकाको न्यूयोर्कमा म्यूजिक फिल्म अवार्ड आयोजना गर्न लागेको कलाकार सुरज सिंह ठकुरीले जानकारी दिए । 

उनले नेपाली चलचित्र अवार्डहरु विभिन्न कारणले बारम्बार विवादमा आउने गरेको बताए । नेपाली भूमि बाहिर रहेको नेपाली चलचित्र र नेपाली संगीत क्षेत्रलाई राम्रो चित्रण गर्ने एउटा माध्यमको रुपमा सो अवार्ड प्रस्तुत हुने उनले विश्वास व्यक्त गरे । 

उनले भने,‘खासै नेपाली चलचित्र अवार्डहरु त्यत्तिको पपुलर चाँही भएको छैन् । म्यानेजमेन्टदेखि धेरै कुरामा त्रुटि होला । सबैलाई खुसी पार्न सकिँदैन् अवार्डमा । विभिन्न कारणले गर्दा नै नेपाली चलचित्र अवार्डहरु बारम्बार विवादमा आउने गर्छ । राम्रो उद्देश्य कार्यक्रमले लिएको छ । नेपाली भूमि बाहिर रहेको नेपाली चलचित्र र नेपाली संगीत क्षेत्रलाई राम्रो चित्रण गर्ने एउटा इभेन्टको रुपमा अवार्ड प्रस्तुत हुन्छ भन्ने मलाई लागेको छ ।’ साथै उनले कार्यक्रमको सञ्चालकको रुपमा आफू रहने पनि बताए ।