‘नागरिक शक्ति, नेपाल’ द्वारा निर्वाचन बहिष्कारको घोषणा

काठमाडौँ: नागरिक शक्ति, नेपालले आगामी फागुन २१ गतेका लागि तय गरिएको संसदीय निर्वाचन बहिष्कार गर्ने घोषणा गरेको छ । पार्टीले एक प्रेस विज्ञप्ति जारी गर्दै निर्वाचनको सम्पूर्ण प्रक्रियाबाट बाहिरिने र समानुपातिकतर्फ दर्ता गरिएका आफ्ना २५ जना उम्मेदवारको नाम फिर्ता लिने निर्णय गरेको जानकारी दिएको हो ।

पार्टीका महासचिव सुभास प्रसाद पाण्डेद्वारा जारी विज्ञप्तिमा वर्तमान सरकारले निष्पक्ष, स्वतन्त्र र भयरहित वातावरणमा निर्वाचन गराउन नसक्ने आरोप लगाइएको छ । मुलुक अराजकता, भ्रष्टाचार र बेथितिबाट आक्रान्त बनेको अवस्थामा केवल सरकार परिवर्तनले मात्र निकास नदिने भन्दै पार्टीले आमूल परिवर्तनको पक्षमा उभिने स्पष्ट पारेको छ ।

विज्ञप्तिमा उल्लेख भएअनुसार, गत भदौमा भएको ‘जेन्जी’आन्दोलनको सम्मतिमा गठित सुशीला कार्की नेतृत्वको सरकारले देशलाई सङ्कटबाट मुक्त गर्ने अपेक्षा गरिएको थियो । तर, सरकारमा सहभागी मन्त्री र सल्लाहकारहरू विध्वंसात्मक गतिविधिमा संलग्न दलहरूसँग आबद्ध रहेको र उनीहरूकै नियन्त्रणमा सरकार सञ्चालन भइरहेकाले निर्वाचन निष्पक्ष हुनेमा आशंका व्यक्त गरिएको छ ।

"सरकारको हालसम्मको क्रियाकलापले उ निष्पक्ष नरहने स्पष्ट पारेको छ । निर्वाचन स्वयम् एउटा अस्वाभाविक द्वन्द्व र हिंसाको कारण बन्ने सम्भावना टड्कारो देखिएको छ," विज्ञप्तिमा भनिएको छ ।

नागरिक शक्ति, नेपालले चुनावी मैदानलाई रणक्षेत्र बनाइने सङ्केतहरू देखिएको र निर्वाचनपश्चात् पनि देशले निकास पाउने कुनै आधार नदेखिएको दाबी गरेको छ । राजनीतिक निकासको मार्ग सुनिश्चित गर्न र निष्पक्ष वा सर्वपक्षीय सरकार गठन नभएसम्म वर्तमान सरकारले गराउने कुनै पनि निर्वाचनमा सहभागी नहुने अडान पार्टीले लिएको छ ।

पार्टीले आफ्ना २५ जना उम्मेदवारको नाम फिर्ता लिँदै निर्वाचन अस्वीकार गर्ने यो निर्णयले राजनीतिक वृत्तमा नयाँ बहस सिर्जना गरेको छ ।