धार्मिक सहिष्णुता अझ मजबुत बनाउन लामा, बज्राचार्य र ब्राम्हण गुरूबाट महाङ्कालको पूजाअर्चना

काठमाडौँ । धार्मिक सहिष्णुता अझ मजबुत बनाउन श्री बौद्धनाथ क्षेत्र विकास समितिले लामा, बज्राचार्य र ब्राम्हण गुरूहरूबाट महाङ्कालको पूजाअर्चना गरी ऐतिहासिक बौद्ध महाङ्काल जात्रा मनाएको छ ।

पूजामा संस्कृति, पर्यटन तथा नागरिक उड्डयन मन्त्री बद्रीप्रसाद पाण्डे र रक्षा मन्त्री मानवीर राईले पनि लामा, बज्राचार्य र ब्राम्हण गुरूहरूद्वारा गरिएको पूजापद्धतिको अवलोकन गरे । उनले महाङ्कालको पूजाअर्चना गरी प्रसाद ग्रहण गर्दै धार्मिक सहिष्णुता कायम राख्नका लागि श्री बौद्धनाथ क्षेत्र विकास समितिले गरेको कामको प्रशंसा समेत गरेका थिए ।

हिन्दु एवं बुद्ध धर्मावलम्वीले आ–आफ्नो धार्मिक विधि–पद्धति अनुरूप समान रूपमा महाङ्कालको पूजाअर्चना गर्ने गर्छन् । 
मङ्गलवार बौद्ध महाङ्काल चौर प्राङ्गणमा लामा, बज्राचार्य र ब्राम्हण गुरूबाट आ–आफ्नो पूजा पद्धतिअनुरूप यज्ञ मण्डप स्थापना गरी  महाङ्कालको पूजा गरिएको दृश्य अत्यन्त मनमोहक थियो । हिन्दू एवं बुद्ध धर्मका अनुयायीहरूको बाक्लो उपस्थितिमा पूजाअर्चना गरिएको थियो ।

हिन्दू र बुद्ध धर्मावलम्वीले महाङ्कालप्रति उत्तिकै आस्था राख्ने हुँदा धार्मिक सहिष्णुता सदैव कायम होस् भन्ने कामनाका साथ लामा, बज्राचार्य र ब्राम्हण गुरूबाट महाङ्कालको पूजाअर्चना गरिएको श्री बौद्धनाथ क्षेत्र विकास समितिका अध्यक्ष राजकुमार लामाले बताए  । पूजाअर्चना पछि प्रसाद ग्रहणसँगै ऐतिहासिक बौद्ध महाङ्का जात्रा शुरू गरिएको थियो ।