भारतीय विदेश सचिवसँग बालेनको भेट, कूटनीतिक प्रोटोकल फेरियो

काठमाडौं : प्रधानमन्त्री बालेन्द्र शाह ले भारतीय विदेश सचिव विक्रम मिस्रीसँग आज भेटवार्ता गर्ने भएका छन् । दुई दिने औपचारिक भ्रमणका लागि बुधबार काठमाडौं आइपुगेका मिस्रीसँगको भेटलाई नेपाल–भारत कूटनीतिक सम्बन्धका दृष्टिले महत्त्वपूर्ण रूपमा हेरिएको छ ।

मिस्रीले नेपालका परराष्ट्र सचिव अमृतबहादुर रायसँग द्विपक्षीय भेटवार्ता गर्ने कार्यक्रमसमेत रहेको छ । साथै उनले नेपालको उच्च राजनीतिक नेतृत्वसँग शिष्टाचार भेट गर्नेछन् ।

यसअघि प्रधानमन्त्री बालेनले विदेशमन्त्रीभन्दा तल्लो तहका विदेशी प्रतिनिधिसँग भेट नगर्ने कूटनीतिक प्रोटोकल बनाएका थिए । यही कारण भारतीय विदेश सचिव मिस्रीको यसअघिको प्रस्तावित नेपाल भ्रमण अन्तिम समयमा स्थगित भएको थियो ।

तर अहिले बालेन आफैँले मिस्रीसँग भेट गर्ने भएपछि उनले बनाएको पुरानो कूटनीतिक प्रोटोकलमा परिवर्तन आएको देखिएको छ । यसअघि अमेरिकी अधिकारीहरूसँग भेट नगरेका बालेनले पछिल्लो समय भारत र चीनका राजदूतहरूसँग पनि छुट्टाछुट्टै भेटवार्ता गरिसकेका छन् ।

मिस्रीको भ्रमणलाई प्रधानमन्त्री बालेनको प्रस्तावित भारत भ्रमणको तयारीका रूपमा समेत हेरिएको छ । नोभेम्बरको अन्तिमतिर भारत भ्रमण गर्ने तयारीमा रहेका बालेनलाई भारतीय प्रधानमन्त्री नरेन्द्र मोदीले निमन्त्रणा गरेका हुन् ।

भारत भ्रमणका क्रममा ऊर्जा, व्यापार, पारवहन, पूर्वाधार, सीमापार कनेक्टिभिटी र लगानीका विषयमा छलफल हुने अपेक्षा गरिएको छ । त्यस्तै लिपुलेक, लिम्पियाधुरा र कालापानीको सीमा विवाद पनि दुई देशबीचको महत्त्वपूर्ण विषय बन्ने देखिएको छ ।

परराष्ट्र मन्त्रालयका अनुसार मिस्रीको भ्रमणका क्रममा नेपाल–भारत सम्बन्धका समग्र पक्षको समीक्षा हुनुका साथै आपसी हितका विषयमा छलफल हुनेछ ।