गणेश नेपालीका परिवारले न्याय पाउनुपर्छ- ओमप्रकाश अर्याल

काठमाडौँ: पूर्वगृहमन्त्री ओमप्रकाश अर्यालले गणेश नेपालीको मृत्युको घटनाप्रति दुःख व्यक्त गर्दै उनका परिवारले न्याय पाउनुपर्ने बताएका छन् । उनले कानुनी शासनको प्रभावकारी कार्यान्वयनबिना सुशासन सम्भव नहुने उल्लेख गर्दै सरकारले नागरिकसँग सहकार्य गरेर राज्य सञ्चालन गर्नुपर्नेमा जोड दिएका छन् ।

सामाजिक सञ्जालमार्फत धारणा सार्वजनिक गर्दै अर्यालले कानुनी राज्यमा नागरिक मात्र होइन, सरकार स्वयंले पनि विधि र कानुनको पूर्ण पालना गर्नुपर्ने बताएका छन् । उनले सरकार र नागरिकबीच सहकार्यको वातावरण बनाउनुपर्नेमा जोड दिँदै प्रतिद्वन्द्विता बढाउने प्रवृत्तिले मुलुकलाई पुनः द्वन्द्व र संकटतर्फ धकेल्न सक्ने चेतावनी दिएका छन् ।

उनले सत्य, निष्ठा र मानवताको आधारमा सबै विचार, वर्ग र समुदायसँग सहकार्य गर्दै राज्य सञ्चालन हुनुपर्ने उल्लेख गरेका छन् । सुशासनको मेरुदण्ड नै कानुनी शासन भएको भन्दै कानुनी शासन भएको देशमा आम नागरिकले सास्ती भोग्ने र सरकारसँग सम्बन्धित व्यक्तिले उन्मुक्ति पाउने अवस्था स्वीकार्य हुन नसक्ने उनको भनाइ छ ।

पूर्वगृहमन्त्री अर्यालले वर्तमान परिस्थितिका संकेत पनि सन्तोषजनक नरहेको टिप्पणी गर्दै स्वर्गीय गणेश नेपालीका परिवारले न्याय पाउनुपर्ने माग गरेका छन् ।