सङ्घीय निजामती सेवा विधेयकको प्रारम्भिक मस्यौदामाथि राय सुझाव दिन आग्रह

काठमाडौँ: सङ्घीय मामिला तथा सामान्य प्रशासन मन्त्रालयले सङ्घीय निजामती सेवा विधेयकको प्रारम्भिक मस्यौदामाथि राय, सुझाव र पृष्ठपोषण दिन सबै सरोकारवाला निकाय, राष्ट्रसेवक कर्मचारी तथा आम नागरिकलाई आग्रह गरेको छ ।

मन्त्रालयले सङ्घीय शासन प्रणालीलाई थप सुदृढ र संस्थागत बनाउन तयार पारिरहेको उक्त विधेयकको प्रारम्भिक मस्यौदा वैशाख ११ गते आफ्नो आधिकारिक वेबसाइटमार्फत सार्वजनिक गरेको जनाएको छ ।

मन्त्रालयका अनुसार मस्यौदा सार्वजनिक भएयता हालसम्म तीन हजार पाँच सयभन्दा बढी राय, सुझाव तथा पृष्ठपोषण प्राप्त भइसकेका छन् । साथै विभिन्न सामाजिक सञ्जालमा व्यक्त भएका सुझाव र प्रतिक्रियासमेत सङ्कलन तथा विश्लेषण भइरहेको छ ।

विधेयकलाई अझ प्रभावकारी बनाउन प्राप्त सुझावहरूलाई व्यवस्थित रूपमा सङ्कलन, अध्ययन र विश्लेषण गर्न प्रशासन सुधार महाशाखा प्रमुखको संयोजकत्वमा कार्यसमूह गठन गरिएको मन्त्रालयले जनाएको छ ।

मन्त्रालयले सार्वजनिक गरिएको मस्यौदा प्रारम्भिक चरणको भएकाले यसमा सुधारका धेरै क्षेत्र रहेको स्वीकार गर्दै अन्तिम रूप दिनुअघि सरोकारवालाबाट प्राप्त सुझावलाई उपयुक्तता र औचित्यका आधारमा समावेश गरिने स्पष्ट गरेको छ ।